“ونڈا کراؤتے سکھ پاؤ” کے تحت اسسٹنٹ کمشنر کلر سیداں شبانہ نذیر کی زیر نگرانی بھلاکھر میں تقریب کا انعقاد

کلرسیداں(یاسر ملک) کلرسیداں زمینوں کے تنازعات کے خاتمے کے لیے “ونڈا کراؤتے سکھ پاؤ” پروگرام کے تحت تقریب۔ وزیر اعلیٰ پنجاب مریم نواز شریف کے ویژن کے مطابق زمینوں کے تنازعات کے خاتمے اور ملکیت و قبضے کے شفاف تعین کے لیے شروع کیے گئے انقلابی منصوبے “ونڈا کراؤتے سکھ پاؤ” کے تحت اسسٹنٹ کمشنر کلر سیداں شبانہ نذیر کی زیر نگرانی بھلاکھر میں تقریب کا انعقاد کیا گیا۔ تقریب کی میزبانی مسلم لیگ (ن) کسان ونگ ضلع راولپنڈی کے صدر چوہدری فیصل حفیظ نے کی، جس میں محکمہ مال کے افسران، نمبرداران اور کسانوں کی بڑی تعداد نے شرکت کی۔ اس موقع پر تقریباً 40 کسانوں سے مشترکہ کھاتوں کی تقسیم کے لیے درخواستیں وصول کی گئیں۔اسسٹنٹ کمشنر شبانہ نذیر نے خطاب کرتے ہوئے کہا کہ وزیر اعلیٰ پنجاب کا یہ منصوبہ عوام کو دہلیز پر مفت سہولت فراہم کرنے کا انقلابی اقدام ہے، جس کے ذریعے زمینوں کے عدود و شمار اور ملکیت کے تنازعات ختم ہوں گے، خواتین کو ان کے وراثتی حقوق ملیں گے اور زمین کی خرید و فروخت میں آسانی پیدا ہو گی۔ یاد رہے کہ حکومت پنجاب نے یکم فروری 2025 سے “ونڈا کراؤتے سکھ پاؤ” پروگرام کے تحت مشترکہ کھاتوں کی مفت تقسیم کا باقاعدہ آغاز کر دیا ہے۔