اسلام آباد (حماد چوہدری) — تھانہ کھنہ پولیس نے شاندار کارروائی کرتے ہوئے ڈی ایچ اے فیز فائیو سے چوری شدہ 1 کروڑ 10 لاکھ روپے مالیت کے طلائی زیورات برآمد کر لیے۔
تفصیلات کے مطابق ایس ایچ او تھانہ کھنہ، عامر حیات کی قیادت میں پولیس ٹیم نے دورانِ گشت سوہان قبرستان کے قریب ایک مشکوک شخص کو گرفتار کیا۔ ملزم کی شناخت عدنان جمیل ولد محمد جمیل کے نام سے ہوئی۔ جامہ تلاشی کے دوران ملزم کے قبضے سے سفید شاپر میں چھپائے گئے قیمتی طلائی زیورات برآمد ہوئے۔
پولیس کے مطابق ابتدائی تفتیش میں ملزم نے انکشاف کیا کہ وہ اسلام آباد کے علاقے ڈی ایچ اے فیز فائیو میں ایک گھر میں گھریلو ملازم تھا اور زیورات اسی گھر سے چوری کیے گئے تھے۔ برآمد شدہ زیورات کی تصدیق کے بعد یہ واضح ہوا کہ یہ سامان تھانہ سہالہ میں درج مقدمہ نمبر 221 کے مسروقہ مال میں شامل ہے۔
قابل ذکر امر یہ ہے کہ ایس ایچ او کھنہ عامر حیات اس سے قبل تھانہ سہالہ میں بھی ایس ایچ او تعینات رہ چکے ہیں، اور اب کھنہ کے علاقے میں کارروائی کرتے ہوئے سہالہ کی حدود سے چوری شدہ قیمتی سونا برآمد کرنے میں کامیاب ہوئے۔
عوامی و سماجی حلقوں نے ایس ایچ او عامر حیات اور کھنہ پولیس کی بروقت اور مؤثر کارروائی کو پولیس کی مثالی کارکردگی قرار دیتے ہوئے انھیں زبردست خراجِ تحسین پیش کیا ہے
