فیصل عرفان پوٹھوہار تے پوٹھوہاری ناں پنکھلے جسم تے نِکے قد ناں اُچا ناں۔ جیہڑا ہر ویلے پوٹھوہار تے پوٹھوہاری نی ہر نشانی تے رہتل نی جستجو وِچ رہنڑاں تے ہر ویلے ہک نویکلہ تے سوہنڑاں ماضی نال جڑیا کوئی نہ کوئی رنگ سامنڑیں کہنی اَشناں۔” پوٹھوہار کلچر ڈے” وی اُس نی ہک نویکلی تے انوکھی سوچ سی۔14 اپریل 2026 کی پنجاب آرٹس کونسل راولپنڈی وچ عملی کم کری تے اُسناں ثبوت پیش کیتا فر وی فیصل عرفان آپنڑیں خود نمائی تے شہرت حاصل نہیں کیتی بلکہ پوٹھوہار ، پوٹھوہاری تے اِس نے نال جڑے ہوئے لوکاں کی ہک جائی کہٹھا کری تے آپنڑیں گم گشتہ ثقافت کی دنیانے سامنڑیں پیش کیتا، سخت محنت تے محبت نال اس کم کی توڑ چاڑیاس۔اِس بہوںسوہنڑیں پروگرام وِچ سارے پوٹھوہار تے پنجاب نی مشترکہ تے پوٹھوہاری نی خوبصورت ثقافت تے رہتل نی چہھلک دِسی۔
پوٹھوہار کلچر ڈے صرف ہک علامتی کوئی پوٹھوہار نی نمائندگی نینہ سی بلکہ اے ہتھوں نِکلنی جانڑیں آپنڑیں تہذیب و تمدن تے رہتل کی ڈھک باہنڑیں ناں پورا پورا حیلہ سی۔ نئی نسل جیہڑی آپنڑیں ثقافت تے تہذیب توں دور ہونڑیں سی پئی اس کی واز ماری تے اس دَر توجہ کرائی گئی۔ اس ناں عملی ثبوت اے آ کہ اس پروگرام کی تمام سوشل میڈیا نے ذرائع جنہاں وچ فیس بک تے دوئے ذرائع اَپر تکھو تے ہر طرف تُساں کی اِس پروگرام نی تشہیر نال نال شوق وی نظر اَشناں، سوشل میڈیا ناں کوئی پروگرام نہیں جیہڑا اِس توں خالی وے۔
پہلے سیشن اچ ٹہھولاں تے تُریاں نال سوہنڑیں” سمی”پیش کیتی گئی ،دوئے سیشن اِچ بندہ ناچیز اشتیاق محمود واہ کینٹ ،غلام اکثر بٹ پنجگراں ، عادل سلطان خاکی تے شکور احسن(گوجر خان) اُراں پوٹھوہاری شادی بیاہ نیاں گالیاں(لوک گیت)نی محفل سجائی ،اِنہاں گالیاںنی تُہم ہرپاسے سی۔ اِنہاں گالیاںنی فرمائش ہر طرفوں آئی، اساں رنگ بنی تے لوکاں کی اِس پاسے کہنی آ ندہ۔خادم علی ارشد تے انہاں نیاں سنگیاں یعقوب انجم راجہ نے مشہور گیت ”اچھو تساں کی سوہنڑاں پوٹھوہار دساں”گائی کے سُنڑنیں تے تکڑیں آلیاں کولوں بہوں داد کہدی، اس گیت اِچ وی مرد اں تے زنانیاں بہوں دل چسپی کہدی۔ قیصر راجا پوٹھوہاری شعرخوانی نی سوہنڑی بزم سجائی، اُنہاں پوٹھوہاری شعر خوانی وچ پوٹھوہاری ناں اُو ہ رنگ بدھا کہ پنجاہ سال پرانڑیں لفظ تے محاورے وی یاد کرائی شوڑے،اُنہاں آپنڑیںخوبصورت آواز نال محفل کی رونق بخشی۔ آخر اِچ پوٹھوہارنیاں مادری زباناں ناں مشاعرہ ہویاجس اِچ شاعراں سوہنڑیں تے نویکلے کلام سنائی محفل لُٹ کہدی۔مشاعرے وِچ پوٹھوہاری شاعراں وی آپنڑیں کمال دَسے تے رُڑنی جلنی ثقافت کی چنگا موٹا تے اُچا ڈھک لایا۔
پوٹھوہاری ادبی بیٹھک راولپنڈی نے دوئے دوستاں جنہاں وچ شکور احسن ، جنید غنی راجہ،عثمان اسلم،نعمان مشتاق راجا،مسرت شیریں ،چنداخیری تے راجہ عنصر جمیل تے ہور دوستاں وی آپنڑاں زبردست حصہ باہیا تے ساہنجے داری کیتی۔عادل سلطان خاکی آر وی اِنہاں کماں وچ شامل رہے۔ یعقوب انجم اُراں وی آپنڑیں نال اکثر بٹ اُراں نی صورت وچ ہک نگینہ پیش کیتا۔
منتظمین اس پروگرام کی طے شدہ شیڈول نے مطابق چلایا،ایڈاطویل تے خوبصورت پروگرام جس وچ پوٹھوہار نے سارے رنگ تے ٹہنگ موجود سے سامعین تے ناظرین پسند کیتے تے جوش تے جذبہ تکھنڑیں نال تعلق رکھنڑاں سا۔ ہر بندے نے منہ اَپر خوشی نی ہک بخری چہھلک نظر اَشنی پئی سی،اس پروگرام نی باز گشت اَغلے سال تک رہسی تے انشاء اللہ اغلے سال اِس سوں وی چنگا پروگرام ہو سی،اِیہہ پروگرام پوٹھوہاری ادب و ثقافت ناں ہک نمائندہ پروگرام سی جس وچ پوٹھوہار نیں سارے رنگاں نی چہھلک دِسی۔ اِسناں سہرا فیصل عرفان ،شکور احسن ، جنید غنی راجہ تے پوٹھوہاری ادبی بیٹھک راولپنڈی نیں ساریاں منتظمین نے سِر آ ،فیصل عرفان تے اُنہاں نیاں ساریاں سنگیاں کی مہھاڑی طرفوں دلی مبارک باد پیش اِی۔ جینڑیں رہو تے خوش رہو۔
