یوم مزدور

سُنیا اے اج چھٹی اے مزدوراں دی
آکھن لگی پیو نوں دھی منظوراں دی
ابا جی اج چھٹی اسیں مناواں گے
اپنے سارے دُکھ تے درد بھلاواں گے
ٹالی تھلے اپنی منجھی ڈھاواں گے
اکٹھے رج دوپہر نوں روٹی کھاواں گے
سُن کے گلاں کہندا ابا سُن کُڑیئے
ایویں اینے خواب خیال نہ بُن کُڑیئے
کم تے جا کے پیسے چار کماواں گا
آندا ہویا راشن نال لیاواں گا
ساڈے ویہڑے دُکھ دی تیز ہنیری اے
پیسے پیسے دی اج لوڑ ودھیری اے
دِھیئے کل نوں ڈولی تینوں پانا اے
تھوڑا تھوڑا کر کے داج بنانا اے
ضد نہ کر تے کم تے مینوں جاون دے
جا کے کِتے دیہاڑی مینوں لاون دے
واہوا اوکھے ہو گئے حال غریباں دے
کم وی اج کل لبھدے نال نصیباں دے
سمجھدار ایں تینوں کی سمجھانا اے
دِھیئے ڈاہڈا اوکھا داج بنانا اے
ساڈے ورگے بے بس تے مجبوراں دی
دِھیئے چھٹی ہُندی نہیں مزدوراں دی۔
(محمد فاروق راجہ / تھوہا خالصہ)