لاہور: پاکستان کرکٹ کے سب سے وفادار اور مقبول سپورٹر، چاچا کرکٹ (صوفی جلیل احمد)، 4 جون کو آسٹریلیا کے خلاف قذافی اسٹیڈیم میں ہونے والے میچ کے دوران آخری بار پاکستان کرکٹ ٹیم کی اپنے مخصوص اور منفرد انداز میں حوصلہ افزائی کریں گے۔
77 سالہ چاچا کرکٹ گزشتہ کئی دہائیوں سے قومی ٹیم کے ساتھ اپنی والہانہ محبت اور جذبے کا اظہار کرتے رہے ہیں۔ وہ نہ صرف پاکستان بلکہ دنیا بھر میں پاکستان کرکٹ کے ایک غیر رسمی سفیر کے طور پر پہچانے جاتے ہیں۔ پاکستان کا جھنڈا تھامے اور سبز ہلالی پرچم کی نمائندگی کرتے ہوئے انہوں نے ہر دور میں قومی ٹیم کا ساتھ دیا اور شائقین کرکٹ کے دلوں میں ایک خاص مقام بنایا۔
چاچا کرکٹ نے خواہش ظاہر کی ہے کہ ان کے آخری میچ کے موقع پر انہیں خصوصی انداز میں الوداع کیا جائے۔ اس موقع پر کرکٹ شائقین، سماجی حلقوں اور کھیلوں سے وابستہ شخصیات کا مطالبہ ہے کہ پاکستان کرکٹ بورڈ (PCB) چاچا کرکٹ کی قومی کرکٹ کے لیے طویل خدمات اور غیر معمولی وابستگی کے اعتراف میں انہیں خصوصی اعزاز، یادگاری شیلڈ یا ایوارڈ سے نوازے۔
شائقین کا کہنا ہے کہ چاچا کرکٹ کی خدمات محض ایک سپورٹر کی نہیں بلکہ پاکستان کرکٹ کے جذبے اور شناخت کی علامت ہیں، لہٰذا ان کی دہائیوں پر محیط وابستگی کو سرکاری سطح پر خراجِ تحسین پیش کیا جانا چاہیے۔
