حیدر کرکٹ کلب کی اسپورٹس بورڈ پنجاب کے خلاف شاندار 10 وکٹوں سے فتح
فیصل آباد: پریذیڈنٹ ٹرافی گریڈ II سلور 2025-26 کے میچ نمبر 13 میں حیدر کرکٹ کلب نے اسپورٹس بورڈ پنجاب کو یکطرفہ مقابلے کے بعد 10 وکٹوں سے شکست دے کر شاندار کامیابی اپنے نام کر لی۔
حیدر کرکٹ کلب نے پہلی اننگز میں 389 رنز کا مجموعہ اسکور بورڈ پر سجایا۔ فائزان نے ذمہ دارانہ بیٹنگ کا مظاہرہ کرتے ہوئے 95 رنز بنائے جبکہ محمد شہباز نے 57 رنز کی عمدہ اننگز کھیلی۔ ٹیم کے کپتان علی عمران زیدی نے بھی 58 رنز کی اہم اننگز کھیل کر ٹیم کے مجموعے میں قیمتی اضافہ کیا۔
جواب میں اسپورٹس بورڈ پنجاب کی پہلی اننگز 111 رنز پر محدود رہی۔ حیدر کرکٹ کلب کے باؤلرز نے شاندار کارکردگی کا مظاہرہ کرتے ہوئے حریف ٹیم کی بیٹنگ لائن کو مکمل طور پر ناکام بنا دیا۔ رومان نے 6 وکٹیں حاصل کیں جبکہ عمران خان نے بھی 6 کھلاڑیوں کو پویلین کی راہ دکھائی۔ اسفندیار نے 3 وکٹیں حاصل کرکے ٹیم کی کامیابی میں اہم کردار ادا کیا۔
فالو آن کے بعد اسپورٹس بورڈ پنجاب نے دوسری اننگز میں کچھ مزاحمت دکھائی، جہاں راؤ عرفان نے 151 رنز کی عمدہ اننگز کھیلی جبکہ افضل منظور نے 51 رنز بنائے، تاہم حیدر کرکٹ کلب کے باؤلرز نے میچ پر اپنی گرفت برقرار رکھی۔
13 رنز کے آسان ہدف کے تعاقب میں حیدر کرکٹ کلب نے بغیر کسی نقصان کے مطلوبہ اسکور حاصل کر لیا اور میچ 10 وکٹوں سے جیت لیا۔
اس کامیابی کے ساتھ حیدر کرکٹ کلب نے پریذیڈنٹ ٹرافی گریڈ II سلور میں اپنی مضبوط پوزیشن برقرار رکھتے ہوئے شاندار ٹیم ورک، بہترین بیٹنگ اور مؤثر باؤلنگ کا مظاہرہ کیا۔
