کلرسیداں‘اغوا کیس کے نامزد ملزم کو رہائی کا حکم

کلر سیداں (نمائندہ پنڈی پوسٹ) مجھے کسی نے اغواء نہیں کیا اپنی مرضی سے گئی تھی اور واپس آ گئی ہوں۔15سالہ مغویہ نے مقامی عدالت میں پیش ہو کر عدالت کے سامنے اپنا بیان قلم بند کروا دیا جس کے بعد معزز جج نے مغویہ کو اس کے والد کے حوالے کرتے ہوئے گرفتار ملزم احسن رضا سکنہ مندرہ کو رہا کرنے کا حکم جاری کر دیا۔جناح کالونی کلر سیداں کی رہائشی مسماۃ (ص)نے تھانہ کلر سیداں میں مقدمہ درج کراتے ہوئے بتایا تھا کہ میں اپنے خاوند اور بچوں کیساتھ ذاتی مکان میں رہائش پذیر ہوں،میری ایک بیٹی مسماۃ (ن م)جو کہ کلاس نہم کی طالبہ ہے دوبیرن روڈ پر واقع ایک نجی سکول میں زیر تعلیم ہے۔گزشتہ روز حسب معمول سکول میں چھٹی ہونے کی وجہ سے میری بیٹی سہ پہر تین بجے کے قریب اپنی نانی کے گھر گئی اور واپس نہ آئی جس پر میں نے اپنی والدہ کو فون کر کے بیٹی سے متعلق پوچھا تو اس نے بتایا کہ وہ یہاں نہیں ہے جس پر مجھے تشویش لاحق ہوئی۔اسی دوران میں نے اپنے موبائل فون کے واٹس ایپ پر چیک کیا تو ایک انجان نمبر سے کچھ واٹس ایپ میرے موبائل فون پر آئے ہوئے تھے جن سے معلوم ہوا کہ میری بیٹی کسی سے رابطے میں رہی ہے اور جب اس نمبر کا ڈیٹا نکلوایا گیا تو حسن رضا نامی نوجوان کا نام سامنے آیا۔