راولپنڈی(نمائندہ پنڈی پوسٹ ) چیف ٹریفک آفیسر راولپنڈی کے احکامات پر عمل کرتے ہوئے سٹی ٹریفک پولیس نے پبلک سروس گاڑیوں میں بغیر فٹنس سرٹیفکیٹ اورغیر قانونی طور پر لگائے جانے والے سی این جی سلنڈر کے خلاف بھرپور کاروائی کا آغاز کر دیا۔غیر معیاری سلنڈرز کو اتروا کر گاڑیوں کے خلاف قانونی کاروائی عمل میں لائی جائے گی۔ تفصیلات کے مطابق چیف ٹریفک آفیسر راولپنڈی رائے مظہر اقبال نے سرکل کے تما م ڈی ایس پیز اور سیکٹر انچارجز کو خصوصی احکامات جاری کیے کہ پبلک سروس گاڑیوں میں بغیر فٹنس سرٹیفکیٹ اور غیر قانونی طور پر لگائے جانے والے سی این جی سلنڈروں کے خلاف سخت اور بلا تخصیص قانونی کاروائی عمل میں لائی جائے ایسی گاڑیوں سے سلنڈر اتروائے جائیں اور فٹنس سرٹیفکیٹ جاری ہونے تک تھانہ میں بند کیا جائے ۔اس موقع پر چیف ٹریفک آفیسر راولپنڈی رائے مظہر اقبال کا کہنا تھا کہ پبلک سروس گاڑیوں میں غیر قانونی سلنڈر کے خلاف کاروائی کا فیصلہ عوام الناس کی جان و مال کی حفاظت کو مد نظر رکھتے ہوئے کیا گیا ہے ۔ایسی گاڑیاں جن کے پاس فٹنس سرٹیفکیٹ نہیں ہے وہ شہریوں کی جان کے لیے خطرہ کا باعث ہیں ۔جن کے خلاف روزانہ کی بنیاد پر کاروائی عمل میں لائی جائے گی تاکہ پبلک سروس گاڑیوں میں سفر کرنے والے مسافروں کے سفرکو محفوظ اور خوشگواربنایا جا سکے ۔ ان کا مزید کہنا تھا کہ پبلک سروس گاڑیوں کے ڈرائیور حضرات پر دوران ڈرائیونگ مسافروں کی جان و مال کے تحفظ کے حوالے سے بھاری ذمہ داری عائد ہوتی ہے ڈرائیور کی ذرا سی غلطی ، لاپرواہی ،غفلت اور قوانین سے لاعلمی یا خلاف ورزی خدانخواستہ کسی بڑے حادثے کا سبب بن سکتی ہے لہذا پبلک سروس گاڑیوں کے ڈرائیور ذمہ داری کا مظاہرہ کریں اپنی گاڑی کو اچھی اور درست حالت میں رکھیں۔ مسافر دوران سفر پبلک سروس گاڑی سے متعلق کسی قسم کی شکایت کی صورت میں ٹریفک پولیس کی ہیلپ لائن051-9273677پر رابطہ کر سکتے ہیں
160
