ہری پور (نمائندہ پنڈی پوسٹ) تربیلا ڈیم کے پانچویں توسیعی منصوبے (T-5) میں حفاظتی بند ٹوٹنے کے باعث منصوبے کی ٹنل میں پانی داخل ہوگیا، جس کے نتیجے میں تعمیراتی مقام پر ہنگامی صورتحال پیدا ہوگئی۔ واقعے کے بعد پاکستانی اور چینی کارکنوں کو محفوظ مقامات پر منتقل کردیا گیا جبکہ ایک مزدور کے زخمی ہونے کی اطلاع ہے۔
پاکستان آبزرور کی 9 نومبر 2026 کی رپورٹ کے مطابق ڈپٹی کمشنر ہری پور وسیم احمد نے واقعے کی تصدیق کرتے ہوئے بتایا کہ حفاظتی بند ٹوٹنے سے پانی T-5 منصوبے کی ٹنل میں داخل ہوا۔ واقعے کے بعد حفاظتی اقدامات کے تحت کارکنوں کا انخلا کیا گیا اور منصوبے پر تعمیراتی سرگرمیاں عارضی طور پر روک دی گئیں۔
حکام کے مطابق واقعے کی وجوہات جاننے کے لیے تحقیقات شروع کردی گئی ہیں۔ حادثے میں ہونے والے نقصان اور منصوبے کی بحالی کے حوالے سے مزید تفصیلات کا انتظار ہے۔
واضح رہے کہ تربیلا ڈیم کا پانچواں توسیعی منصوبہ (T-5) چین کے تعاون سے تعمیر کیا جارہا ہے۔ اس سے قبل بھی اگست 2025 میں منصوبے کے کوفرڈیم کو نقصان پہنچنے کا واقعہ پیش آیا تھا، جس پر تحقیقاتی کمیٹی نے واپڈا، کنسلٹنٹ اور تعمیراتی کمپنی کی کارکردگی پر سوالات اٹھائے تھے۔
