آج کا بنیادی سوال یہ نہیں کہ نوجوان کے پاس ڈگری ہے یا نہیں بلکہ یہ ہے کہ اس ڈگری کے ساتھ اس کے پاس کون سی عملی مہارتیں موجود ہیں؟ مصنوعی ذہانت، یعنی اے آئی (Artificial Intelligence)، نے روزگار اور تعلیم کی دنیا میں ایک نئی بحث شروع کر دی ہے۔ وہ کام جو کبھی صرف انسان انجام دیتے تھے، آج کئی جگہوں پر مشینیں اور ذہین سافٹ ویئر انجام دے رہے ہیں۔ لیکن اس کا مطلب یہ نہیں کہ ڈگری بے کار ہوگئی ہے۔ڈگری اب بھی ضروری ہے، مگر صرف ڈگری کافی نہیں رہی۔ آج کا گریجویٹ اگر اپنی ڈگری کے علم کو جدید ٹیکنالوجی کے ساتھ جوڑ لیتا ہے تو وہ پہلے سے کہیں زیادہ موثر بن سکتا ہے۔ ایک مینجمنٹ کا طالب علم اگر ڈیٹا اینالیٹکس اور اے آئی ٹولز استعمال کرنا جانتا ہو، ایک استاد اگر اے آئی کے ذریعے ذاتی نوعیت کا تعلیمی مواد تیار کرسکتا ہو، ایک صحافی اگر ڈیجیٹل تحقیق اور فیک نیوز کی شناخت جانتا ہو، اور ایک ڈاکٹر اگر جدید ڈیٹا ٹیکنالوجی کو سمجھتا ہو تو اس کی پیشہ ورانہ صلاحیت کئی گنا بڑھ سکتی ہے۔
یہی وجہ ہے کہ 2026 میں پاکستان میں اعلیٰ تعلیم کے نظام کو اے آئی اور جدید مہارتوں سے ہم آہنگ کرنے پر زور دیا جا رہا ہے۔آج بھی ڈاکٹر بننے کے لیے میڈیکل تعلیم، انجینئر بننے کے لیے انجینئرنگ کی تعلیم اور استاد بننے کے لیے متعلقہ علمی و تدریسی تربیت ضروری ہے۔ اے آئی ان بنیادی تعلیمات کو ختم نہیں کرتی، بلکہ انہیں نئے طریقوں سے استعمال کرنے کا موقع دیتی ہے۔اصل تبدیلی یہ ہے کہ کل کا گریجویٹ صرف اپنے مضمون کا ماہر نہیں ہوگا؛ اسے ٹیکنالوجی کے ساتھ کام کرنا بھی آنا ہوگا۔ کیا ہماری یونیورسٹیاں طلبہ کو صرف امتحان پاس کرنے کے لیے تیار کر رہی ہیں یا حقیقی زندگی کے مسائل حل کرنے کے لیے بھی؟اگر طالب علم چار سال یونیورسٹی میں گزارنے کے بعد صرف کتابی تعریفیں یاد کرکے نکلتا ہے، لیکن اسے مسئلہ حل کرنا، ٹیم کے ساتھ کام کرنا، تحقیق کرنا، پریزنٹیشن دینا، ڈیجیٹل ٹولز استعمال کرنا اور اپنی مہارت کو عملی منصوبے میں تبدیل کرنا نہیں آتا تو ڈگری کا مقصد ادھورا رہ جاتا ہے۔
مستقبل انسان بمقابلہ مشین کی جنگ نہیں، بلکہ انسان اور مشین کے تعاون کا دور ہے۔جو گریجویٹ اے آئی سے خوفزدہ ہوگا وہ شاید پیچھے رہ جائے، لیکن جو گریجویٹ اے آئی کو سمجھ کر اسے اپنی صلاحیت بڑھانے کے لیے استعمال کرے گا، اس کے لیے نئے مواقع پیدا ہوں گے۔ تاہم اے آئی کا ایک خطرناک پہلو بھی ہے۔ اگر طالب علم ہر کام مشین سے کروانے لگے تو اس کی اپنی سوچ کمزور ہوسکتی ہے۔ اگر مضمون لکھنے سے لے کر تحقیق، اسائنمنٹ اور پریزنٹیشن تک ہر کام اے آئی کے حوالے کردیا جائے تو طالب علم کے پاس ڈگری تو ہوگی، مگر علم اور فکری خودمختاری کم ہوسکتی ہے۔ پاکستان کے نوجوانوں کے لیے اس تبدیلی میں ایک بہت بڑا موقع بھی موجود ہے۔
ہمارے پاس ایک بڑی نوجوان آبادی ہے۔ اگر یہی نوجوان اپنی یونیورسٹی کی تعلیم کے ساتھ ڈیجیٹل مہارتیں، اے آئی، انگریزی کمیونیکیشن، تحقیق، ڈیٹا، کاروباری سوچ اور مسئلہ حل کرنے کی صلاحیتیں حاصل کرلیں تو وہ صرف مقامی ملازمتوں کے امیدوار نہیں رہیں گے بلکہ عالمی ڈیجیٹل معیشت کا حصہ بن سکتے ہیں۔ آج ایک نوجوان پاکستان میں بیٹھ کر دنیا کے کسی بھی ملک کے ادارے کے لیے آن لائن کام کرسکتا ہے۔ لیکن اس کے لیے صرف ڈگری نہیں، قابلِ فروخت مہارت ضروری ہے۔یہاں والدین کا کردار بھی اہم ہے۔ ہمیں بچوں سے صرف یہ نہیں پوچھنا چاہیے کہ ”کتنے نمبر آئے؟” بلکہ یہ بھی پوچھنا چاہیے کہ ”کیا سیکھا؟”، ”کیا بنا سکتے ہو؟”، ”کون سی نئی مہارت حاصل کی؟” اور ”اپنے علم کو عملی زندگی میں کیسے استعمال کرو گے؟”کل کا گریجویٹ وہ نہیں ہوگا جو صرف ڈگری لے کر یونیورسٹی سے نکلے گا کل کا گریجویٹ وہ ہوگا جو علم، مہارت، تجربہ، تخلیقی سوچ اور ٹیکنالوجی کو ایک ساتھ استعمال کرنا جانتا ہوگا۔
