14 اگست کا دن ہر سال ہمیں یہ یاد دہانی کراتا ہے کہ آزادی کسی نعمت سے کم نہیں۔ یہ دن محض جشن اور چراغاں کا نہیں، بلکہ عہدِ وفا کا دن ہے۔ اس بار کا یومِ آزادی پاکستان کے لیے خوشخبریوں اور کامیابیوں کا پیامبر ہے۔ معاشی شعبے میں مثبت پیش رفت، کھیلوں میں شاندار کارکردگی، اور ٹیکنالوجی میں نئے سنگِ میل اس بات کا ثبوت ہیں کہ پاکستان ترقی کی راہ پر گامزن ہے۔
گزشتہ ایک سال میں پاکستانی نوجوانوں نے دنیا بھر میں اپنی صلاحیتوں کا لوہا منوایا۔ ہماری صنعت نے برآمدات میں نمایاں اضافہ کیا، زرعی شعبے نے تاریخی پیداوار دی، اور آئی ٹی سیکٹر نے عالمی منڈی میں اپنی جگہ مزید مستحکم کی۔ یہ سب اس وقت ممکن ہوا جب قوم نے مشکل حالات کے باوجود ہمت اور حوصلے کا دامن تھامے رکھا۔
یومِ آزادی ہمیں قائداعظم محمد علی جناحؒ کے اس خواب کی یاد دلاتا ہے جو انہوں نے ایک آزاد، مضبوط اور خوشحال پاکستان کی صورت میں دیکھا تھا۔ آزادی کا حقیقی مفہوم صرف پرچم لہرانے میں نہیں بلکہ اپنے کردار، عمل اور محنت سے ملک کو ترقی کی راہ پر ڈالنے میں ہے۔
آج ہمیں اس بات کا عہد کرنا ہوگا کہ ہم اپنے اختلافات کو پسِ پشت ڈال کر ایک جھنڈے تلے یکجا ہوں گے۔ کیونکہ جب قوم ایک ہو تو کوئی طاقت ہمیں منزل سے نہیں روک سکتی۔ آنے والے دنوں میں ہماری محنت، اتحاد اور قربانی ہی وہ قوت ہوگی جو پاکستان کو دنیا کی صفِ اول کی قوموں میں شامل کرے گی۔
آؤ! مل کر یہ عہد کریں کہ ایک ہے قوم اور ایک ہی منزل — پاکستان کی سربلندی۔
