موہڑہ بھٹاں

میرا گاؤں موہڑہ بھٹاں ہےجوکہ راولپنڈی سے مشرق کی جانب سے پینتیس کلومیٹر کےفاصلےپرکلرسیداں روڈ کے ساتھ واقع ہے یہ یونین کونسل مغل کا ایک تاریخی گاؤں ہے اس کی آبادی ہزاروں نفوس پر مشتمل ہےجن میں اکثریت روزی کمانے کاخاطر بیرون ممالک میں مقیم ہے باقی گاؤں میں رہنے والےبیشتر افراد کا پیشہ کھیتی باڑی ہےہمارے گاؤں میں دوفصلیں سال میں بوئی جاتی ہیں ان میں ایک گندم جبکہ دوسری مکئی ہے فصل کی کٹائی کے موقع پر گاؤں کےلوگ ایک دوسرے کا ہاتھ بٹاتےہیں تاکہ ان کا کامجلد ختم ہوسکے میرے گاؤں میں ایک گورنمنٹ بوائز اور ایک گرلز پرائمری سکول ہےمیرےگاؤں کے لوگ اپنے بچوں کو سرکاری سکول میں داخل کروانے کی بجائےگھرسےدورساگری مانکیالہ شاہ باغ کے علاقوں کے پرائیویٹ سکولوں میں تعلیم دلوانےکو ترجیح دے رہے ہیں جس کی وجہ سے اپنے گاؤں کے بوائز پرائمری سکول میں طالبعلموں کی تعداد انتہائی کم ہوکررہ گئی ہے جب کہ وہاں تجربہ کار تین اساتذہ موجود ہیں

میرےگاؤں میں پاکستان بننے سےقبل بیشتر سکھ اور ہندؤ آباد تھے ان کو یہاں سے گئےتریسٹھ سال کا عرصہ گزرگیا لیکن ان کی بنائی گئیں عبادت گاہیں مندر کی شکل میں ابھی تک موجود ہیں جو کہ ایک تاریخی گاؤں ہونے کی نشاندہی کرتے ہیں جبکہ ایک مندرکےبالمقابل حال ہی میں ایک خوبصورت مسجد تعمیرکرائی گئی ہے جس پر لاکھوں روپےخرچ ہوئے ہیں اور یہ اخراجات انگلینڈ اور ہانگ کانگ میں مقیم گاؤں کے لوگوں نےبرداشت کئے ہیں مسجد کے مینار کی اونچائی ایک سوفٹ ہے جوکہ میلوں دورسے نظرآتا ہےجبکہ مسجد کے اندرسے تزئین شیشوں سے کی گئی ہے شاندار مسجد بننے کی وجہ سے دوردورسے لوگ اس کو دیکھنے کیلئے آتے ہیں میرے گاؤں میں بجلی ٹیلیفون گیس اور پانی جیسی سہولتیں موجود ہیں لوگ خوشحال زندگی گزار رہے ہیں اللہ تعالی دعا ہے کہ وہ میرے گاؤں کو دن دگنی رات چوگنی ترقی عطا فرمائےاور گاؤں کے لوگوں میں اتفاق واتحاد سےزندگی گزارنے کی توفیق دے.آمین

ثناء اللہ اختر، دانشورکے مطابق موہڑہ بھٹاں کی تاریخ

پاکستان کے قیام سے قبل جب میں اپنی اوائل عمر میں راولپنڈی کے ایک موضع موہڑہ وینس میں تھا تو اس کی تمام آبادی مسلمان ہونے کی بنا پر غیر مسلموں کے بارے لاعلم تھا مگر پرائمری سکول موہڑہ بھٹاں میں پانچ سال کی عمر میں داخلہ لیا تو سکھ اساتذہ کی مخصوص پگڑیوں اور اپنے ہم جماعت لڑکوں کے سروں پر لٹیں دیکھ کر معلوم ہوا کہ اس علاقے میں دوسری قومیں بھی موجود ہیں اور اسی طرح ایک دن اساتذہ نے وقت سے پہلے ہی چھٹی دے دی اور سکول کے باہر آکر دیکھا کہ ایک میت کے ساتھ لوگ بجائے افسردہ حالت میں ڈھول بجاتے ہوئے جارہے تھے۔ جس پر حیرانی ہوئی۔ تعلیم کے دوران ہندوؤں اور سکھ لڑکوں کے ساتھ کھیلتے تھے مگر اچھوت وغیرہ سے بھی بے خبر تھے۔ مجھے یاد ہے کہ ایک بار جب میں اپنے ہندو ہم جماعت کے گھر گیا تو اس کی والدہ نے مٹھائی کھلائی۔ آزادی کی تحریکوں کے بارے میں سوائے خاکسار تحریک کے علم نہ تھا اور وہ بھی اس وجہ سے میرے والد راجہ شیر زمان خاکسار تحریک سے وابسطہ یعنی سالا ر ضلع تھے اور ان کی ایک فوٹو ڈرائنگ روم میں آویزاں تھی اور ایک چمک دار بیلچہ بھی موجود تھا اور جب وہ گاؤں آتے تھے تو کئی خاکسار وردیوں میں اور بیلچوں کے ساتھ سے ملنے آتے تھے۔ اس وقت کے سیاسی رہنماؤں قائداعظم، مسٹر گاندھی یا علامہ مشرقی کا نام نہیں سنا تھا۔ البتہ علامہ اقبال کے بارے میں معلوم تھا کیونکہ ان کے اشعار خوبصورت فریموں میں ڈرائنگ روم میں لگے ہوئے تھے۔ پہلی بار1945ء میں کسی شخص نے سکول کے باہر ایک پوسٹر چسپاں کیا۔ جسے دیکھنے کیلئے طالب علم اور عام لوگ جمع ہوگئے۔ اس میں مہاتما گاندھی کو قائداعظم سے مخاطب ہوکر گفتگو کرتے ہوئے دکھایا گیا تھا جبکہ قائداعظم نے اپنا چہرہ دوسری طرف کیا ہوا تھا۔ جیسے کہ وہ ان کی بات سننا نہیں چاہتے۔ یہ گاندھی جناح مذاکرات کا زمانہ تھا۔ اس زمانے میں ہندوؤں اور مسلمانوں کے الگ الگ گاؤں تھے جو پرامن طور پر کھیتی باڑی یا دکانداری وغیرہ کرتے تھے اور ان میں تعلیم یافتہ سکول ٹیچر یا دفاتر میں کلرک یعنی بابو تھے اور صرف ان ہی سیاسی حالات سے زیادہ دلچسپی تھی اور ایسی سرگرمیوں کے مراکز شہری آبادی میں تھے۔ 1947ء میں جب پاکستان بننے کی اطلاع ہوئی تو سکول بند کردیا گیا۔ کیونکہ لوٹ مار، آگ لگانے اور غنڈوں کے حملوں کی خبریں آنے لگیں۔ ایک دن بعد دوپہر چند ہندو اور سکھ ہمارے گاؤں آئے اور کہا کہ وہ گاؤں چھوڑ کر جارہے ہیں۔ میں نے بھی ان کو ہمارے رشتہ داروں سے الوداعی ملاقات کرتے ہوئے دیکھا۔ جن سے انکی ہمیشہ سے دوستی رہی تھی اور وہ پھر بوجھل قدموں کے ساتھ چلے گئے اور دوسرے دن موہڑہ بھٹاں کے تمام غیر مسلم اپنے آبائی گھروں کو چھوڑ کر چلے گئے۔ پاکستان کے قیام سے متعلق جوتصور اور خواب مسلمانوں نے دیکھا تھا اسکی تعبیر کی آرزو دل میں ہمیشہ رہتی ہے کاش یہ آرزو ہماری زندگی میں پوری ہوجائے۔

موہڑہ وینس کے رہائشی ماسٹر محمد ارشاد کے مطابق جب وہ 1943میں گورنمنٹ پرائمری سکول موہڑہ بھٹاں میں داخل ہوئے تواس وقت سکول میں ہیڈماسٹر بالک سنگھ اور ماسٹر امرناتھ پڑھاتے تھے جو کہ موہڑہ بھٹاں ہی کے رہائشی تھے۔ اس وقت سکول کے دو تین کمرے تھے گاؤں میں ایک کپڑے کی بہت بڑی دکان تھی جس کا مالک سکھ تھا۔ گاؤں کے گردونواح میں تقریباً چھ تالاب(بن) تھے جن کے کنارے اینٹوں اورپتھروں سے پختہ کیا گئے تھے ان تالابوں میں کے کناروں پر برگد، پیپل اور شہتوت کے درخت ہوا کرتے تھے۔یہاں بسنے والا ہندو اور سکھ جو امیر اور صاحب جائیداد تھے۔ قیام پاکستان وقت موہڑہ بھٹاں واحد ایک ایسا گاؤں تھا جہاں کوئی خون ریزی نہ ہوئی بلکہ یہاں کے رہنے والے لوگوں کے گردونواح کے گاؤں موہڑہ وینس، آراضی سوہال، موہڑہ جمعہ اور لوہدرہ کے لوگوں کے ساتھ دوستی بھائی چارے تھے اور وہ جانے سے قبل ان لوگوں کے پاس رات کو رہے اور ملاقاتیں کیں دوسرے دن مانکیالہ ریلوے اسٹیشن پر انگریز فوج آئے جنہوں نے علاقہ میں موجود ہندوؤں اور سکھوں کو اکٹھا کرکے پرامن طور پر انڈیا پہنچایا۔یہ لوگ اپنا سارا قیمتی سامان ودیگر جانور یہاں ہی چھوڑ گئے تھے جو انڈیا سے آنے والے مہاجرین نے موہڑہ بھٹاں میں آکر آباد ہوئے انہوں نے اس سامان کو سستے داموں فروخت کیا۔{jcomments on}

اہم خبریں

موہڑہ بھٹاں

خبر پر اظہار رائے کریں