اسلام آباد کے سیکٹر جی-8 میں ایک افسوسناک واقعہ پیش آیا جہاں ایک نوجوان چائنیز خاتون نے رہائشی عمارت کی چھت سے چھلانگ لگا دی، جس کے نتیجے میں وہ موقع پر ہی جاں بحق ہو گئی۔
پولیس ذرائع کے مطابق جاں بحق ہونے والی خاتون کی شناخت وان رو پینگ کے نام سے ہوئی ہے، جو وزٹ ویزا پر پاکستان آئی ہوئی تھیں۔ واقعے کی اطلاع ملتے ہی پولیس کی نفری فوری طور پر موقع پر پہنچی اور علاقے کو گھیرے میں لے لیا۔
ابتدائی تحقیقات کے مطابق خاتون کو چھلانگ لگانے کے باعث سر پر شدید چوٹیں آئیں جو جان لیوا ثابت ہوئیں۔ پولیس نے لاش کو قانونی کارروائی کے لیے قریبی اسپتال منتقل کر دیا ہے، جہاں ضروری میڈیکل اور قانونی تقاضے مکمل کیے جا رہے ہیں۔
پولیس حکام کا کہنا ہے کہ واقعے کے تمام پہلوؤں سے جائزہ لیا جا رہا ہے، جبکہ خودکشی یا کسی اور ممکنہ وجہ کو خارج از امکان قرار نہیں دیا جا سکتا۔ واقعے سے متعلق شواہد اکٹھے کیے جا رہے ہیں اور قریبی افراد سے بھی پوچھ گچھ جاری ہے۔
مزید تحقیقات مکمل ہونے کے بعد ہی واقعے کی اصل وجوہات سامنے آ سکیں گی۔
