بحریہ ٹاؤن فیز 4 میں غیرقانونی مساج سینٹرز کی آڑ میں فحاشی کا دھندہ جاری، پولیس خاموش تماشائی

اسلام آباد بحریہ ٹاؤن فیز 4 کے پوش علاقے “سِوِک سینٹر” میں قائم دو مساج سینٹرز مساج کے نام پر مبینہ طور پر فحاشی کو فروغ دیا جا رہا ہے۔ ذرائع کے مطابق ان سینٹرز کو دو خواتین چلا رہی ہیں جو بااثر افراد سے روابط کی بنیاد پر قانونی کارروائی سے بچی ہوئی ہیں۔مقامی رہائشیوں نے ان غیر قانونی سرگرمیوں پر شدید تشویش کا اظہار کرتے ہوئے متعلقہ حکام سے فوری نوٹس لینے کا مطالبہ کیا ہے۔ شہریوں کا کہنا ہے کہ ان مراکز کی وجہ سے علاقے کا ماحول خراب ہو رہا ہے اور خاندانی نظام متاثر ہو رہا ہے۔ذرائع کے مطابق ان مراکز میں نہ صرف غیر اخلاقی سرگرمیاں جاری ہیں بلکہ ان کا تعلق کئی بااثر اور سفید پوش افراد سے بھی بتایا جاتا ہے، جس کی وجہ سے متعلقہ پولیس تاحال کسی قسم کی کارروائی کرنے سے گریزاں ہے۔علاقہ مکینوں نے چیف کمشنر اسلام آباد، آئی جی پولیس اور دیگر اعلیٰ حکام سے مطالبہ کیا ہے کہ وہ فوری طور پر ان مساج سینٹرز کی تحقیقات کریں اور ذمہ داران کے خلاف سخت قانونی کارروائی عمل میں لائیں۔