شنگھائی، چین – پاکستانی طالب علم اور پنڈی پوسٹ کے کالم نگار عاکف ایاز جتوئی کو چین کی ممتاز یونیورسٹی “دونگھوا یونیورسٹی” میں بین الاقوامی طلباء کی طلباء یونین میں بطور نائب صدر منتخب کر لیا گیا ہے۔ اس کامیابی کو عالمی سطح پر پاکستانی نوجوانوں کے مثبت کردار اور قیادت کی پہچان قرار دیا جا رہا ہے۔
عاکف ایاز جتوئی نے انتخابات میں کامیابی کے بعد اپنے خطاب میں پاکستان کی نمائندگی کرتے ہوئے جذبہ حب الوطنی سے بھرپور تقریر کی، جس میں انہوں نے نوجوانوں کو متحد ہو کر ترقی، تعلیم اور عالمی بھائی چارے کے فروغ کے لیے کام کرنے کی تلقین کی۔عاکف نے اس کامیابی کو اپنی ذاتی محنت کے ساتھ ساتھ اپنے والدین کی دعاؤں، اساتذہ کی رہنمائی اور دوستوں کی حوصلہ افزائی کا نتیجہ قرار دیا۔ ان کا کہنا تھا:
*”یہ اعزاز صرف میرا نہیں، بلکہ میرے والدین، میرے اساتذہ، اور میرے ان ساتھیوں کا ہے جنہوں نے ہمیشہ میری ہمت بندھائی اور میری کامیابی کے لیے دعائیں کیں۔”*
واضح رہے کہ عاکف ایاز جتوئی اس سے قبل بھی مختلف بین الاقوامی فورمز پر پاکستان کے نوجوانوں کی نمائندگی کرچکے ہیں۔
ان کی تحریریں، تقاریر اور علمی سرگرمیاں انہیں طلباء میں خاص مقام دلا چکی ہیں۔دونگھوا یونیورسٹی میں ان کا بطور نائب صدر انتخاب نہ صرف پاکستان بلکہ دنیا بھر میں تعلیم حاصل کرنے والے نوجوانوں کے لیے حوصلہ افزا پیغام ہے کہ محنت، لگن اور خلوص کے ساتھ دنیا کے کسی بھی کونے میں کامیابی حاصل کی جا سکتی ہے
۔عاکف ایاز جتوئی کی اس کامیابی پر پاکستانی کمیونٹی، تعلیمی حلقوں، اور سوشل میڈیا صارفین ، دوستوں ،اساتذہ اور عزیز و اقارب کی جانب سے مبارکباد کا سلسلہ جاری ہے۔
