جہلم (نمائندہ خصوصی ظفر رشید)
جہلم کے معروف اور بین الاقوامی سطح پر شہرت یافتہ فوٹوگرافر محمد رفیق اویسی قضائے الٰہی سے وفات پا گئے۔ ان کی نماز جنازہ آج 13 مئی بروز منگل صبح 11:30 بجے مرکزی جنازہ گاہ جہلم میں ادا کی جائے گی۔
مرحوم محمد رفیق اویسی نہ صرف پاکستان بلکہ دنیا بھر میں اپنے فنِ عکاسی کے ذریعے جہلم کی پہچان بنے۔ حکومتِ پاکستان کی جانب سے انہیں ان کی فنی خدمات کے اعتراف میں صدارتی ایوارڈ سے بھی نوازا گیا تھا۔
ذرائع کے مطابق مرحوم ایک ممتاز فوٹوگرافر ہونے کے ساتھ ساتھ ایک باکمال خطاط بھی تھے۔ انہوں نے متعدد بار مکمل قرآنِ پاک کو مختلف عربی رسم الخط میں اپنے دستِ مبارک سے تحریر کرنے کا شرف حاصل کیا۔ ان کی یہ دینی خدمات انتہائی عقیدت و احترام کے ساتھ یاد رکھی جاتی ہیں۔
شہری، اہلِ علاقہ اور مرحوم کے چاہنے والوں کی بڑی تعداد ان کے انتقال پر افسوس کا اظہار کر رہی ہے۔ جہلم ایک عظیم فنکار، نیک سیرت شخصیت اور باصلاحیت سپوت سے محروم ہو گیا ہے۔
