اسلام آباد ( پنڈی پوسٹ) وفاقی دارالحکومت میں غیر قانونی انڈور شیشہ کیفوں کے خلاف ضلعی انتظامیہ کا کریک ڈاؤن جاری ہے۔ کاروائی کے دوسرے روز بھی تمام اسسٹنٹ کمشنرز نے اپنے اپنے علاقوں میں بلا امتیاز کاروائیاں کرتے ہوئے 14 شیشہ کیفے سیل کر دیے جبکہ 10 افراد کو گرفتار کر لیا گیا۔
ترجمان ضلعی انتظامیہ کے مطابق، عدالت کے احکامات کی روشنی میں انڈور شیشہ کیفے چلانے کی اجازت نہیں ہے۔ آؤٹ ڈور شیشہ کیفے کے لیے متعلقہ اسسٹنٹ کمشنر کے دفتر سے پرمٹ لینا لازمی قرار دیا گیا ہے۔
تفصیلات کے مطابق:اے سی سٹی نے ایف-7 میں دو معروف شیشہ کیفے سیل کر دیے۔اے سی رورل نے سوک سینٹر میں چار کیفے بند کرتے ہوئے چار افراد کو گرفتار کیا۔اے سی شالیمار نے ای-11 میں چھ شیشہ کیفے سیل کیے اور چھ افراد کو حراست میں لیا۔اے سی انڈسٹریل ایریا نے بھی دو شیشہ کیفے بند کر دیے۔
ترجمان کا کہنا ہے کہ 18 سال سے کم عمر افراد کو شیشہ فراہم کرنا بھی عدالتی احکامات کے تحت ممنوع ہے اور اس خلاف ورزی پر سخت قانونی کاروائی کی جائے گی۔
ڈی سی اسلام آباد کی ہدایت پر آئندہ بھی اس نوعیت کی بلا تفریق کاروائیاں جاری رہیں گی تاکہ قانون پر عمل درآمد یقینی بنایا جا سکے اور نوجوان نسل کو مضر صحت سرگرمیوں سے محفوظ رکھا جا سکے۔
