اسلام آباد (بہرام خان ۔ نمائندہ پنڈی پوسٹ) – وزیراعظم پاکستان محمد شہباز شریف آج بروز ہفتہ 5 اکتوبر کو تین روزہ سرکاری دورے پر ملائیشیا روانہ ہو گئے۔ یہ دورہ 5 سے 7 اکتوبر 2025 تک جاری رہے گا، جس کے دوران وزیراعظم کوالالمپور میں اعلیٰ سطحی ملاقاتیں کریں گے۔
سرکاری ذرائع کے مطابق، وزیراعظم شہباز شریف اس دورے کے دوران ملائیشین ہم منصب اور دیگر اعلیٰ حکام سے دوطرفہ تعلقات، تجارتی و اقتصادی تعاون، سرمایہ کاری، تعلیم، اور ٹیکنالوجی سمیت مختلف شعبوں میں باہمی دلچسپی کے امور پر بات چیت کریں گے۔
دورے کے دوران دونوں ممالک کے درمیان مختلف مفاہمتی یادداشتوں (MoUs) اور معاہدوں پر دستخط کیے جانے کی توقع ہے، جن کا مقصد دوطرفہ تعاون کو مزید وسعت دینا ہے۔
وزیراعظم کے ہمراہ اعلیٰ سطحی سرکاری وفد بھی موجود ہے، جس میں وزراء، اعلیٰ حکام، اور کاروباری شخصیات شامل ہیں۔
تجزیہ کاروں کے مطابق یہ دورہ پاکستان اور ملائیشیا کے مابین بڑھتے ہوئے تعاون اور سفارتی تعلقات کو مزید مستحکم کرنے میں اہم سنگ میل ثابت ہو سکتا ہے۔
یاد رہے کہ پاکستان اور ملائیشیا کے درمیان دیرینہ برادرانہ تعلقات قائم ہیں، جنہیں مختلف شعبوں میں وسعت دینے کے لیے دونوں ممالک مسلسل کوشاں ہیں۔
