مری(اویس الحق سے)مری میں برف باری کا سلسلہ جاری ہے جس کے باعث ملک بھر سے بڑی تعداد میں سیاحوں نے مری کا رخ کر لیا۔
موسم سرما کی برفباری میں موجودہ صورتحال کے پیشِ نظر ڈسٹرکٹ پولیس آفیسر مری رضا تنویر سپرا خود فیلڈ میں موجود ہیں اور برف باری کے دوران سیکیورٹی، ٹریفک مینجمنٹ اور سیاحوں کی رہنمائی کے انتظامات کی براہِ راست نگرانی کر رہے ہیں۔
ڈی پی او مری کی ہدایت پر مری پولیس مکمل الرٹ ہے جبکہ پولیس افسران و اہلکار مال روڈ، مری ایکسپریس وے، کشمیر پوائنٹ، پنڈی پوائنٹ، نیو مری اور دیگر اہم مقامات پر تعینات ہیں تاکہ سیاحوں کو ہر ممکن سہولت فراہم کی جا سکے اور ٹریفک کی روانی کو برقرار رکھا جا سکے،کسی بھی ہنگامی صورتحال سے نمٹنے کے لیے پولیس ٹیمیں ہمہ وقت فیلڈ میں موجود ہیں۔
ڈی پی او مری رضا تنویر سپرا نے موقع پر موجود افسران کو ہدایت کی کہ سیاحوں کے ساتھ خوش اخلاقی سے پیش آیا جائے،انہیں بروقت رہنمائی فراہم کی جائے اور کسی بھی مشکل کی صورت میں فوری مدد یقینی بنائی جائے۔
اس موقع پر ڈی،پی،او نے سیاحوں کے لیے اہم ہدایات جاری کیں جس میں سیاحوں کو کہا گیا کہ جس میں سفر سے قبل موسم اور ٹریفک صورتحال کی تصدیق ضرور کریں،گاڑیوں میں برف کے لیے موزوں ٹائر، چین اور ایمرجنسی سامان لازمی رکھیں،غیر ضروری سفر سے گریز کریں اور صرف مجاز راستوں کا استعمال کریں۔
انھوں نے مزید کہا کہ سڑکوں پر گاڑیاں کھڑی کرنے سے اجتناب کریں تاکہ ٹریفک کی روانی متاثر نہ ہو،پولیس اور ضلعی انتظامیہ کی جاری کردہ ہدایات پر مکمل عمل کریں،مری پولیس سیاحوں کی حفاظت اور سہولت کو اولین ترجیح دیتے ہوئے ہمہ وقت فرائض سرانجام دے رہی ہے۔
ڈی،پی،او نے مزید کہا کہ کسی بھی ایمرجنسی کی صورت میں فوری طور پر پولیس ہیلپ لائن 15 یا قریبی پولیس اہلکار سے رابطہ کریں۔
