کلرسیداں(نمائندہ پنڈی پوسٹ) کلر سیداں رکشہ حادثہ، ایک جاں بحق، دو شدید زخمی۔کلر سیداں کے نواحی علاقے چوک پنڈوڑی میں ایک افسوسناک ٹریفک حادثہ پیش آیا جہاں تیز رفتار رکشہ بے قابو ہو کر دیوار سے ٹکرا گیا۔ حادثے کے نتیجے میں جواں سال ڈرائیور قمر خان ولد عالم نور خان موقع پر ہی دم توڑ گیا، جبکہ دو نوجوان شدید زخمی ہو گئے۔
تفصیلات کے مطابق حادثہ روف آباد کے قریب پیش آیا۔ زخمیوں میں سے ایک کی حالت تشویشناک بتائی جا رہی ہے۔ ذرائع کے مطابق جاں بحق ہونے والا قمر خان اور زخمی نوجوان آپس میں کزن تھے۔ مرنے والا اور ایک زخمی گنگھوٹھی روڈ بھکڑال کے رہائشی ہیں جبکہ دوسرا زخمی پنڈوڑی کا رہائشی ہے۔حادثے کے بعد علاقے میں کہرام مچ گیا اور مقامی افراد نے اپنی مدد آپ کے تحت زخمیوں کو فوری طور پر قریبی اسپتال منتقل کیا۔ عینی شاہدین کے مطابق رکشہ تیز رفتاری کے باعث قابو سے باہر ہو گیا تھا
جس کے نتیجے میں یہ المناک سانحہ پیش آیا۔اہل علاقہ نے بڑھتے ہوئے ٹریفک حادثات پر گہری تشویش کا اظہار کرتے ہوئے انتظامیہ سے مطالبہ کیا ہے کہ ٹریفک قوانین پر سختی سے عملدرآمد کرایا جائے اور رکشوں و دیگر گاڑیوں کی فٹنس باقاعدگی سے چیک کی جائے تاکہ آئندہ قیمتی جانوں کو ضائع ہونے سے بچایا جا سکے۔
