طارق پرویز ایک ایسی شخصیت ہیں جنہوں نے خدمتِ خلق کو ہمیشہ اپنی اولین ترجیح بنایا۔ اگرچہ وہ انگلینڈ میں مقیم ہیں اور وہاں اپنا ذاتی کاروبار کامیابی سے چلا رہے ہیں، لیکن ان کے دل کی دھڑکنیں ہمیشہ اپنے آبائی علاقے بیول اور اس کے عوام کے ساتھ جڑی رہتی ہیں۔
یہی وجہ ہے کہ وہ نہ صرف اپنے علاقے کی فلاح و بہبود کے لیے سرگرم رہے بلکہ انہوں نے کھیلوں کے فروغ، ترقیاتی کاموں اور عوامی مسائل کے حل کے لیے عملی اقدامات کیے۔بیول شہر میں کھیلوں کے میدانوں کو آباد کرنے کا سہرا طارق پرویز کے سر جاتا ہے۔
وہ پہلے شخص تھے جنہوں نے نوجوانوں کے لیے کھیلوں کی سرگرمیوں کو فروغ دینے کی ٹھانی اور ہر چھوٹے بڑے ٹورنامنٹ کو سپانسر کیا۔ ان کی مسلسل کوششوں کی بدولت بیول میں کھیلوں کی سرگرمیاں پروان چڑھیں، جس سے نوجوانوں کو مثبت اور صحت مند مصروفیات میسر آئیں۔
کھیلوں کی ترقی کے بعد انہوں نے اپنے علاقے کے بنیادی مسائل کی طرف توجہ دی اور ترقیاتی منصوبوں میں بڑھ چڑھ کر حصہ لیا۔ ذاتی پیسوں سے گلیاں پختہ کروائیں، مختلف علاقوں میں بجلی کے کھمبے اور ٹرانسفارمرز لگوائے تاکہ عوام کو بنیادی سہولتیں حاصل ہو سکیں۔
ان کے یہ اقدامات کسی حکومتی مدد کے بغیر کیے گئے، جو اس بات کی علامت ہیں کہ وہ حقیقی معنوں میں عوام کی خدمت کا جذبہ رکھتے ہیں۔
طارق پرویز کا ایک اور نمایاں پہلو ان کی انسان دوستی ہے۔ وہ بے شمار خاندانوں کی مالی مدد کرتے ہیں، تاکہ وہ بہتر زندگی گزار سکیں۔ ان کی سخاوت اور فلاحی کاموں کی وجہ سے وہ نہ صرف بیول بلکہ شرقی گوجرخان کے ایک اہم سماجی رہنما کے طور پر پہچانے جاتے ہیں۔
ان کے یہی اوصاف انہیں سیاست میں بھی ایک مضبوط حیثیت دلاتے ہیں اور یہی وجہ ہے کہ ان کا ایک بڑا سیاسی دھڑہ موجود ہے، جو ہر الیکشن میں ان کی بھرپور حمایت کے لیے تیار رہتا ہے۔ ان کی عوامی مقبولیت کی بنیادی وجہ یہ ہے
کہ وہ سیاست کو محض اقتدار حاصل کرنے کا ذریعہ نہیں سمجھتے بلکہ عوام کی فلاح و بہبود کے لیے اسے ایک موقع تصور کرتے ہیں۔یہ بہت کم لوگ ہوتے ہیں جو بیرون ملک جا کر بھی اپنے علاقے کو نہیں بھولتے، لیکن طارق پرویز ان معدودے چند شخصیات میں سے ایک ہیں جو انگلینڈ میں رہتے ہوئے
بھی اپنے علاقے کی ترقی اور وہاں کے عوام کی مشکلات کے حل کے لیے سرگرم رہتے ہیں۔ ان کی سوچ اور عملی اقدامات اس بات کا ثبوت ہیں کہ وہ اپنے علاقے اور وہاں کے لوگوں کی بہتری کے لیے ہمیشہ فکر مند رہتے ہیں۔
ان کی خدمات، ایمانداری اور عوامی بہبود کا جذبہ انہیں دوسروں سے ممتاز کرتا ہے، اور یہی وہ اوصاف ہیں جن کی بدولت وہ ایک مثالی سماجی اور سیاسی شخصیت کے طور پر پہچانے جاتے ہیں۔
