تھانہ کراچی کمپنی کے علاقہ G8 مرکز راوی روڈ سگنل پر مسلح ڈکیتی کی واردات کے دوران ڈاکو کار سوار شہری سے نوٹوں سے بھرا بریف کیس جس میں 1 کروڑ 31 لاکھ روپے کی رقم موجود تھی چھین کر فرار ہوگئے۔ ڈاکوؤں نے فائرنگ کرکے شہری کو زخمی بھی کیا۔ پولیس تھانہ کراچی کمپنی نے واقعہ کا مقدمہ درج کرلیا ہے۔ واقعہ 25 جون 2021ء کو دن دیہاڑے پیش آیا۔کوئٹہ سے تعلق رکھنے والا متاثرہ شہری عبدالمتین نے پولیس کو بتایاکہ میں اپنے دوست محمد حنیف اور اس کے بیٹے عبدالحکیم کے ساتھ گاڑی نمبر 315 زیڈ اے ٹیوٹا فیلڈر میں سوار ہوکر الائیڈ بینک بلیو ایریا آیا ۔ بینک سے ساڑھے سات لاکھ روپے نکلوائے اور وہاں سے پھر اپنے دوست اور اس کے بیٹے کے ساتھ ملٹی پروفیشنل کوآپریٹو ہاؤسنگ سوسائٹی (ملٹی آفس ) جی ایٹ مرکز جارہا تھا جب پمز ہسپتال سے بجانب راوی روڈ سگنل پر پہنچا تو تین نامعلوم افراد جنہیں سامنے آنے پر شناخت کر سکتا ہوں سلور رنگ کی سوزوکی کلٹس نمبر 511 پر آئے۔ ہم پر فائرنگ کی۔ اسی دوران ایک فائر میری دائیں ٹانگ پر لگا میں شدید زخمی ہوگیا۔دو ملزمان میری گاڑی چھین کر فرار ہوگئے۔ راستے میں چھینی گئی گاڑی بے قابو ہو کر فٹ پاتھ سے جا ٹکرائی۔ جس پر ملزمان نے میری گاڑی وہیں چھوڑ دی اور گاڑی میں پڑا میرا بریف کیس جس میں 1 کروڑ 31 لاکھ روپے کی رقم موجود تھی اٹھا کر اپنے تیسرے ساتھی کی کلٹس گاڑی میں بیٹھ کر فرار ہوگئے۔پولیس نے شہری کی درخواست پر مقدمہ درج کرکے تحقیقات شروع کر دی ہے۔
