کہوٹہ (نمائندہ پنڈی پوسٹ) کہوٹہ میں ڈکیتی کے دوران خاتون کے قتل کے مقدمے میں اہم پیش رفت سامنے آئی ہے، جہاں عدالت نے نامزد ملزم کو ناکافی شواہد کی بنیاد پر بری کر دیا۔ایڈیشنل ڈسٹرکٹ اینڈ سیشن جج خورشید عالم بھٹی نے تھانہ کہوٹہ کے علاقہ دھلیتر میں پیش آنے والے ڈکیتی اور قتل کے مقدمے کی سماعت کے بعد ملزم چن زیب کو بری کرنے کا حکم جاری کیا۔ ملزم پر الزام تھا کہ اس نے اپنے دیگر ساتھیوں کے ہمراہ دھلیتر کے رہائشی محمد ریاض کے گھر ڈکیتی کی واردات کی۔
استغاثہ کے مطابق واردات کے دوران ملزمان کی فائرنگ سے محمد ریاض کی اہلیہ جاں بحق ہو گئی تھیں، جس کے بعد پولیس نے مقدمہ درج کر کے ملزم چن زیب کو گرفتار کیا تھا۔ کیس کی سماعت کے دوران وکیل صفائی نے مؤقف اختیار کیا کہ ملزم کے خلاف ٹھوس اور ناقابل تردید شواہد موجود نہیں ہیں۔
عدالت نے فریقین کے دلائل سننے کے بعد وکیل صفائی کے مؤقف سے اتفاق کرتے ہوئے قرار دیا کہ استغاثہ ملزم پر جرم ثابت کرنے میں ناکام رہا ہے۔ ناکافی شواہد کی بنیاد پر عدالت نے ملزم چن زیب کو بری کرنے کا حکم دے دیا۔
فیصلے کے بعد عدالت میں موجود افراد کی جانب سے مختلف ردعمل سامنے آیا، جبکہ قانونی ماہرین کا کہنا ہے کہ فوجداری مقدمات میں جرم ثابت کرنے کے لیے ٹھوس شواہد کی موجودگی ناگزیر ہوتی ہے۔
Discover more from pindipost.pk
Subscribe to get the latest posts sent to your email.
