اسلام آباد (نمائندہ پنڈی پوسٹ)وزیراعظم شہباز شریف نے کہا ہے پاکستان انٹرنیشنل ایئر لائنز (پی آئی اے )کی نجکاری میں شفافیت اور میرٹ کو یقینی بنایا جا رہا ہے ، 23 دسمبر کو نجکاری کیلئے بولی کا عمل ملک بھر میں ٹی وی پر براہ راست نشر کیا جائے گا ۔ان خیالات کا اظہار انہوں نے پی آئی اے کی نجکاری میں حصہ لینے والے تمام بڈرز، کاروباری شخصیات اور کمپنیوں کے نمائندوں سے گفتگو کرتے ہوئے کیا جنہوں نے بدھ کو وزیر اعظم ہاؤس میں ان سے ملاقات کی۔
وزیر اعظم نے کہا پی آئی اے کا کھویا ہوا تشخص بحال کرنے اور قومی ایئرلائن کو عصری تقاضوں سے ہم آہنگ کرنے کیلئے نجکاری کا عمل جاری ہے ۔ انہوں نے اس توقع کا اظہار کیا کہ انشا ء اﷲ جلد پی آئی اے ایک مرتبہ پھر سے گریٹ پیپل ٹو فلائی ود کی اپنی روایات پر پورا اترنے لگے گی۔ انہوں نے کہا پی آئی اے کی نجکاری کے عمل میں شفافیت اور میرٹ کو یقینی بنایا جا رہا ہے ، بڈنگ کا عمل ملک بھر میں ٹی وی پر براہ راست نشر کیا جائے گا۔
وزیر اعظم نے کہا پی آئی اے کی دنیا بھر میں پروازوں کی بحالی سے بیرون ملک مقیم پاکستانیوں کیلئے سہولت ہوگی۔ انہوں نے کہا سیاحتی شعبے کی ترقی کیلئے بھی قومی ایئر لائن کو عصری تقاضوں سے ہم آہنگ کرنا انتہائی ضروری ہے ۔ وزیر اعظم نے اس امید کا اظہار کیا کہ جو بھی بڈنگ کے بعد اس اہم ذمہ داری کو سنبھالے گا وہ قومی ایئر لائن کے تشخص کی بحالی اور اس کی ترقی پر اپنی بھرپور توانائیاں مرکوز کرے گا۔وزیر اعظم نے بتایا پی آئی اے کی بڈنگ 23 دسمبر 2025 کو ہوگی جس کو تمام میڈیا پر براہ راست نشر کیا جائے گا۔
