پنجاب میں بلدیاتی انتخابات کے روشن امکانات

حکومت پنجاب کے جاری کردہ بلدیاتی آرڈیننس کے مطابق سیاسی جماعت یا آزاد امیدوار صرف پینل کی صورت میں ہی آنے والے بلدیاتی انتخابات میں حصہ لے سکیں گے یعنی آزاد پینل رجسٹرڈ کیے بغیر اب کوئی بھی گروپ یا شخص انفرادی طور پر بلدیاتی الیکشن میں حصہ نہیں لے سکتا مگر آنے والے بلدیاتی انتخابات میں مختلف کیٹیگریز میں امیدواروں کی تعلیمی قابلیت کے بارے میں ابھی تک کوئی حتمی فیصلہ سامنے نہیں آیا ہے تاہم سوشل میڈیا پر اس حوالے سے یہ افواہیں گردش کررہی تھیں کہ آنے والے بلدیاتی انتخابات میں حصہ لینے کیلیے کونسلر کیلیے میٹرک چیرمین کیلیے بی اے جبکہ نائب چیرمین کے امیدوار کیلیے تعلیمی شرط ایف اے رکھی گئی ہے مگر الیکشن کمیشن کیجانب سے فی الحال اس حوالے سے ابھی تک باقاعدہ نوٹیفیکیشن جاری نہیں کیا گیا ہے لہذا بلدیاتی انتخابات میں حصہ لینے والے امیدوار ان افواہوں پر کان نہ دھریں دوسری ایک اہم وجہ یہ بھی ہے کہ موجودہ قومی وصوبائی اسمبلی کے بعض اراکین جو ملک کی قانون سازی میں بڑھ چڑھ کر حصہ لیتے ہیں وہ اگر اس تعلیمی شرط سے مستثنی ہیں تو پھر نچلی سطح پربلدیاتی انتخابات میں حصہ لینے والے امیدواروں پرتعلیمی اہلیت کی قدغن لگانا بظاہر مناسب نہیں لگتا تاہم ذاتی نقطہ نظر سے کوئی بھی ذی شعور انسان موجودہ دور میں منتخب سیاسی نمائندوں کی تعلیمی اہلیت کی شرط سے انکار نہیں کرسکتا بالخصوص کسی بھی عوامی عہدہ رکھنے کیلیے متعلقہ شخص کا تعلیم یافتہ ہونا انتہائی ضروری ہے کیونکہ اقتدار میں آکر بہت سی ایسی تجاویز قانونی ضابطوں کے مندرجات تحریری طور پر پرنٹ شدہ ہوتے ہیں جنکا مطالعہ کرنے کے بعد انکے خدوخال کے مختلف پہلوؤؤں اور انکی خوبیوں اور خامیوں اورنتائج سے آشنا ہونا اور اس سے متعلقہ نکات کو سمجھنا ایک عوامی نمائندے کیلیے نہایت ضروری ہوتا ہے اگر عوامی نمائندہ پڑھا لکھا نہ ہو تو پھر مسائل تو ہونگے لہذا راقم کی نظر میں یونین کونسل اور تحصیل سطح پر امیدوار کیلیے کم از کم میٹرک پاس ہونا لازمی شرط ہونی چاہیے جبکہ ضلعی سطح پر اگر گریجوایشن تک تعلیم کی حد مقرر کیجائے تو اس میں کوئی حرج نہیں ہے رواں سال جنوری میں پنجاب بلدیاتی ایکٹ 2021 اور ترمیمی آرڈیننس کے حوالے سے منعقدہ ایک اجلاس میں مسلم لیگ ن نے بلدیات کے انتخابات میں چیرمین اور نائب چیرمین کیلیے ایف اے کی تعلیمی شرط پر نہ صرف اعتراضات اٹھائے تھے بلکہ اسے ختم کرنے کی سفارش بھی کی گئی تھی یاد رہے اس سے قبل جنرل مشرف کے دور میں پارلیمنٹ اور صوبائی اسمبلیوں کا رکن بننے کیلیے گریجوایشن تک تعلیم لازمی شرط رکھی گئی تھی تاہم بعد ازاں پیپلز پارٹی کے دور میں یہ شرط ختم کردی گئی تھی لیکن جعلی ڈگری رکھنے والوں کیلیے پارلیمنٹ کے دروازے ہمیشہ بند ہوگئے تھے پنجاب میں نئے بلدیاتی نظام کے تحت مرحلہ وار پولنگ کی تجویز زیرغور ہے جس میں 22 ہزار ویلج کونسلز کا انتخاب ہو گانئے نظام کے تحت گاؤں کی سطح پر براہ راست فنڈز جائیں گے اور پنجاب کی 22 ہزار پنچائیت کو 40 ارب روپے کے فنڈز ملیں گے جبکہ بڑے شہروں میں میئربراہ راست منتخب ہونگے اور وہ اپنی مرضی کی کابینہ لا سکیں گے جس میں ٹیکنو کریٹ بھی شامل ہوں گے اس نظام کے تحت سیوریج، کوڑا کرکٹ ٹھکانے لگانے، انفراسٹرکچر سڑکوں کی
تعمیرومرمت بنیادی صحت کی فراہمی اور ہنگامی حالات کی منصوبہ بندی جیسے اقدامات کو موثرانداز میں آگے بڑھایا جاسکے گا جبکہ دیہات کی سطح پر یونین کونسل یا ویلیج کونسل کے سسٹم کی بحالی بھی خاصی اہمیت کی حامل ہے کیونکہ اس سے دیہی سطح پر گلی نالی بجلی کی فراہمی سڑکوں کی تعمیر پانی کی اسکیموں کے علاوہ دیگر خانگی جھگڑوں کی صورت میں تھانہ یا کوٹ کچہری میں معاملات لے جانے کی بجائے مسائل پنچائیت کے زریعے حل کیے جاسکتے ہیں موجودہ حکومت نے پنجاب میں رواں سال مرحلہ وار بلدیاتی انتخابات کے انعقاد کا تہیہ کر رکھا ہے تاہم وفاق میں لمحہ بہ لمحہ بدلتی سیاسی صورتحال کے پیش نظر اپوزیشن اتحاد کی تحریک عدم اعتماد کے حوالے سے حکومت اور اپوزیشن قومی اسمبلی میں اپنی عددی برتری ثابت کرنے کے دعوے کررہی ہیں اور اس وقت ملک میں سیاسی جوڑ توڑ کا ایک طوفان برپا ہے تاہم اب چونکہ وزیراعظم کے خلاف تحریک عدم باقاعدہ اسمبلی میں پیش کی جا چکی ہے جس پر اراکین کی رائے شماری ہونا ابھی باقی ہے تاہم اگر حکومت اس عدم اعتماد کی تحریک کو ناکام بنانے میں کامیاب ہوجاتی ہے جو بظاہر نظر نہیں آرہا تو پھر رواں سال پنجاب میں بلدیاتی انتخابات کے انعقاد کے امکانات روشن ہیں تاہم اپوزیشن اتحاد کی کامیابی کی صورت میں مختصر عرصہ کے بعد نگران حکومت کا قیام عمل میں لایا جاسکتا ہے اور موجودہ سیاسی نظام کی بساط کو لپیٹ کر ملک میں نئے عام انتخابات منعقد کرانے کے امکانات کو بھی خارج از امکان قرار نہیں دیا جاسکتا اور حکومت کی تبدیلی کی صورت میں ملک میں ایک طویل عرصے تک بلدیاتی انتخابات التوا کا شکار ہوسکتے ہیں۔