راولپنڈی (آصف شاہ ،نمائندہ پنڈی پوسٹ) پاکستان تحریک انصاف کے مرکزی رہنما اور سابق صوبائی وزیر قانون محمد بشارت راجہ کو جمعرات کے روز راولپنڈی میں گرفتار کر لیا گیا۔ ذرائع کے مطابق انہیں تھانہ نیو ٹاؤن منتقل کر دیا گیا ہے۔
راجہ بشارت آج راولپنڈی الیکشن ٹریبیونل میں حلقہ NA-55 سے متعلق کیس کی پیشی پر پہنچے تھے، جہاں سے انہیں اچانک حراست میں لے لیا گیا۔ پی ٹی آئی کی جانب سے اس گرفتاری کی شدید مذمت کی گئی ہے۔
گرفتاری کے بعد میڈیا سے گفتگو کرتے ہوئے راجہ بشارت نے کہا:”میرے تمام مقدمات میں ضمانت کنفرم ہے، ان اوچھے ہتھکنڈوں سے ہم گھبرانے والے نہیں۔ یہ گرفتاریاں ہمارے حوصلے پست نہیں کر سکتیں۔”
تحریک انصاف کے ترجمان کا کہنا ہے کہ راجہ بشارت کی گرفتاری سیاسی انتقام کی ایک اور کڑی ہے، اور انہیں صرف اپنی سیاسی وابستگی اور حق سچ کی آواز بلند کرنے کی سزا دی جا رہی ہے
