نالج کاسٹل اکیڈمی کی دوسری برانچ کا شاندار افتتاح فتح جنگ چوک، اٹک میں منعقد ہوا۔ افتتاحی تقریب کے مہمانِ خصوصی معروف ماہرِ تعلیم اور سابق ڈی آئی او ایجوکیشن اٹک، راجہ مختار احمد سگھروی تھے جنہوں نے ادارے کے بانی وژن کو سراہتے ہوئے فیتہ کاٹ کر باقاعدہ افتتاح کیا۔
تقریب میں شہر کی نمایاں تعلیمی اور علمی شخصیات نے شرکت کی جن میں حافظ عمر وقاص پرنسپل حرا ماڈل سکول اٹک، افتخار احمد پرنسپل کریسنٹ کالج اٹک، ذیشان احمد کامسیٹس یونیورسٹی اٹک، سینئر صحافی و کالم نگار اقبال زرقاش، شبیر احمد ایف جی پبلک ہائی اسکول، ڈاکٹر حامد، محمد ماجد، محمد صفدر، لطافت اور محمود شامل تھے۔
میزبانی کے فرائض محمد فرخ شہزاد، صدام حسن، عادل خان، عبید اللہ اور نعیم حسن نے سرانجام دیے، جبکہ تقریب کی نظامت راجا فرخ نے کی۔
اس موقع پر نالج کاسل اکیڈمی کی تعلیمی کارکردگی کا اعتراف کرتے ہوئے نمایاں کامیابیاں حاصل کرنے والے طلبہ میں اسناد تقسیم کی گئیں۔ خاص طور پر میٹرک کے امتحان میں اعلیٰ نمبرات حاصل کرنے والے دو طلبہ کو خصوصی ٹرافیاں پیش کی گئیں، جنہیں حاضرین نے بھرپور داد دی۔
مہمانِ خصوصی راجہ مختار احمد سگھروی نے اپنے خطاب میں کامیاب طلبہ کو مبارکباد پیش کی اور اُنہیں مستقبل میں مزید کامیابیاں حاصل کرنے کے لیے قیمتی رہنمائی اور تعلیمی اصولوں سے روشناس کروایا۔ انہوں نے کہا کہ ایسی درسگاہیں نئی نسل کے لیے روشن چراغ کی حیثیت رکھتی ہیں، جہاں نہ صرف علم دیا جاتا ہے بلکہ کردار سازی پر بھی زور دیا جاتا ہے۔
تقریب کے اختتام پر مہمانوں کی تواضع کی گئی اور ادارے کی نئی برانچ کے کامیاب آغاز پر نیک خواہشات کا اظہار کیا گیا۔
