میرپور (نمائندہ خصوصی) – ایس ایس پی ضلع میرپور خاور علی شوکت کی خصوصی ہدایت پر ڈی ایس پی سٹی چوہدری عنصر علی اور ایس ایچ او تھانہ پولیس نیو سٹی میرپور چوہدری محمد ارشد کی زیر نگرانی بڑی کارروائی عمل میں لائی گئی۔
پولیس ٹیم جس میں راجہ اختر محمود ہیڈ کانسٹیبل اور صغیر قریشی DFC شامل تھے، نے برنالہ میں کامیاب چھاپہ مار کر لینڈ کروزر پراڈو رینٹ پر حاصل کر کے فروخت کرنے والے نوسرباز گروپ کے سرغنہ ملزم منیب فاروق ولد محمد فاروق قوم راجپوت ساکن سیکٹر F نیو سٹی میرپور کو گرفتار کر لیا۔
ملزم پر الزام ہے کہ اس نے لینڈ کروزر پراڈو ماڈل 2012 کرائے پر لی اور فروخت کر کے فرار ہو گیا تھا۔ ایس ایچ او تھانہ نیو سٹی چوہدری محمد ارشد نے اپنی ٹیم کے ہمراہ کمال مہارت اور حکمت عملی سے ملزم کو گرفتار کر کے حوالات میں بند کر دیا۔
پولیس ذرائع کا کہنا ہے کہ تفتیش جاری ہے اور اہم راز فاش ہونے کے امکانات ہیں۔ خدشہ ظاہر کیا جا رہا ہے کہ کئی با اثر شخصیات بھی اس گروہ کے نرغے میں آ سکتی ہیں۔
عوامی و سماجی حلقوں نے ایس ایچ او چوہدری محمد ارشد اور ان کی ٹیم کی کامیاب کارروائی پر خراج تحسین پیش کیا ہے۔
