راولپنڈی (حماد چوہدری )مورگاہ پارک ویو سوسائٹی کے مکین شدید پریشانی کا شکار ہیں، جہاں حالیہ بارش کے باعث بجلی کی فراہمی معطل ہوئے تین روز گزر چکے ہیں۔ شہریوں کے مطابق واپڈا کی جانب سے اب تک نہ کوئی مرمتی عملہ بھیجا گیا اور نہ ہی کسی قسم کی بحالی کی کوشش کی گئی ہے۔اہلِ علاقہ کا کہنا ہے کہ بار بار واپڈا آفس مورگاہ میں شکایات درج کرائی گئیں مگر کوئی خاطر خواہ کارروائی عمل میں نہیں آئی۔دوسری جانب، چکلالہ کینٹ بورڈ کی صفائی ٹیم نے بھی رسمی کارروائی کرتے ہوئے محض چند مقامات سے کیچڑ صاف کیا، جبکہ بیشتر گلیاں آج بھی کیچڑ اور گندگی سے بھری پڑی ہیں۔علاقہ مکینوں نے وزیر اعلیٰ پنجاب محترمہ مریم نواز سے مطالبہ کیا ہے کہ وہ اپنے ترقیاتی دعوؤں کے برعکس زمینی حقائق کا نوٹس لیں اور واپڈا و بلدیاتی اداروں کو فوری کارروائی کے احکامات جاری کریں تاکہ عوام کو بنیادی سہولیات فراہم کی جا سکیں۔
