ڈپٹی کمشنر اٹک راؤ عاطف رضا نے کہا ہے کہ عیدالاضحی کے موقع پر ستھرا پنجاب صفائی مہم کے ورکرز نے شاندار اور قابل تحسین کام کیاہے۔انہوں نے ان خیالات کا اظہار ستھرا پنجاب مہم کے ورکرز کے اعزازمیں تقریب سے خطاب کرتے ہوئے کیا۔اس موقع پر ٹکٹ ہو لڈر مسلم لیگ نوازملک حمید اکبر،ضلعی صدر مسلم لیگ نواز سلیم شہزاد،سابق چیئر مین بلدیہ اٹک ناصر محمود شیخ،چیف آفیسر بلدیہ اٹک سردار آفتاب احمد خان،مسلم لیگ نواز کی خاتون رہنما خالدہ رعنا،مینیجر راولپنڈی ویسٹ مینجمنٹ کمپنی ولید عباسی اور دیگر متعلقہ افسران بھی موجود تھے،تقریب سے خطاب کرتے ہوئے ڈی سی اٹک راؤ عاطف رضا نے کہا کہ حکومت پنجاب کی ہدایات کی روشنی میں ضلعی و تحصیل انتظامیہ اٹک کی جانب سے ضلع بھر میں آج کے روز ستھراپنجاب مہم کے ورکرزکی اعلیٰ کارکردگی کے سلسلے میں تقاریب منعقد ہو رہی ہیں جس میں ان کووزیراعلیٰ پنجاب مریم نواز شریف کی جانب سے کیش ایواڈز دیئے جارہے ہیں۔انہوں نے کہا کہ امسال عیدالاضحی کے مو قع پر ستھرا پنجاب کے ورکرزنے ضلع بھر میں صفائی کا موثر انتظام کیا جو قابل تحسین ہے۔ورکرز نے شدید گرمی کے موسم میں اپنے فرائض تندہی اور ایمانداری سے سر انجام دیئے جو قابل ستائش ہیں۔ راؤ عاطف رضا نے کہا کہ عیدالاضحی کے موقع پرستھرا پنجاب کے ورکرز نے مسلسل تین روز قربانی کے جانوروں کی آلائشوں کو ٹھکانے لگایا اور اس ضمن میں ہمیں ستھرا پنجاب کے عملے پر فخر ہے۔وزیراعلیٰ پنجاب مریم نواز شریف نے خصوصی طور پر ستھرا پنجاب کے عملے کو سراہا ہے۔ڈی سی اٹک نے کہا کہ معاشرے میں موجودہر فرد کو صفائی ستھرائی کے لیے مل جل کر کام کر نا ہو گا کیونکہ یہ ہمارے ایمان کا حصہ ہے اور اس سلسلے میں ہم سب کو اجتماعی آگاہی فراہم کر نے کی ضرورت ہے۔ اس موقع پر ٹکٹ ہو لڈر مسلم لیگ نوازملک حمید اکبر،ضلعی صدر مسلم لیگ نواز سلیم شہزاد،سابق چیئر مین بلدیہ اٹک ناصر محمود شیخ نے اس موقع پر کہا کہ وہ ستھرا پنجاب مہم شروع کر نے پر وزیراعلیٰ پنجاب مریم نواز شریف کے مشکور ہیں کہ ان کے اس انقلابی اقدام کی وجہ سے عوام کو سہولت فراہم کی گئی۔آخر میں ستھرا پنجاب کے عملے میں چیک تقسیم کیے گئے۔
10
