راولپنڈی: اڈیالہ جیل کے باہر تحریک انصاف کی رہنما علیمہ خان کی موجودگی میں صحافی طیب بلوچ پر مبینہ تشدد کا واقعہ پیش آیا، جس کے بعد متعلقہ تھانے میں مقدمہ درج کر لیا گیا ہے۔
پولیس کے مطابق، مقدمہ متاثرہ صحافی طیب بلوچ کی مدعیت میں درج کیا گیا ہے جس میں علیمہ خان کو نامزد کیا گیا ہے، جبکہ متعدد نامعلوم تحریک انصاف کارکنان کو بھی شاملِ تفتیش کیا گیا ہے۔ ایف آئی آر میں الزام لگایا گیا ہے کہ علیمہ خان کی موجودگی میں پی ٹی آئی کارکنوں نے طیب بلوچ پر حملہ کیا، انہیں زدوکوب کیا، اور ان کا کیمرہ و دیگر صحافتی سامان بھی نقصان پہنچایا گیا۔
واقعے کی ویڈیوز سوشل میڈیا پر وائرل ہو چکی ہیں، جن میں صحافی کے ساتھ بدسلوکی کے مناظر دیکھے جا سکتے ہیں۔ صحافتی تنظیموں نے واقعے کی سخت مذمت کرتے ہوئے حکومت سے فوری تحقیقات اور ذمہ داران کے خلاف کارروائی کا مطالبہ کیا ہے۔
پولیس حکام کا کہنا ہے کہ مقدمے کی روشنی میں واقعے کی مکمل تحقیقات کی جا رہی ہیں اور سی سی ٹی وی فوٹیج سمیت دیگر شواہد جمع کیے جا رہے ہیں۔
ابھی تک علیمہ خان یا تحریک انصاف کی طرف سے کوئی باضابطہ بیان سامنے نہیں آیا۔
