گورنمنٹ گریجویٹ کالج اٹک کے شعبہ زبان و ادبیات اُردو میں پنجاب یونیورسٹی کے شیڈول کے مطابق بی ایس اردو (سمسٹر ہشتم) کے پہلے بیج کے 10 منتخب طلبہ و طالبات کے تحقیقی مقالوں (Theses) کا زبانی امتحان نہایت کامیابی سے منعقد ہوا۔ ممتحن کی حیثیت سے معروف محقق، نقاد اور شاعر پروفیسر ڈاکٹر ارشد محمود ناشاد (صدر شعبہ اردو، علامہ اقبال اوپن یونیورسٹی اسلام آباد) خصوصی طور پر تشریف لائے۔
ادبی اور تنقیدی موضوعات پر مشتمل تحقیقی مقالات کی جانچ پڑتال نہایت سنجیدہ اور علمی ماحول میں مکمل کی گئی۔ ڈاکٹر ناشاد نے طلبہ کے تحقیقی معیار، موضوعات کی معنویت اور مقالہ نگاری کی تکنیک کو سراہتے ہوئے مفید رہنمائی فراہم کی۔
اس موقع پر ایک طالبہ رمشا نوید کا تحقیقی مقالہ بعنوان “شہزاد بھٹی کی کالم نگاری: تجزیاتی جائزہ” بھی شامل تھا، جو معروف ادیب، صحافی اور کالم نگار شہزاد حسین بھٹی کے کالمی سفر اور اسلوب پر مبنی تھا۔ رمشا نوید کو زبانی امتحان میں کامیاب قرار دیا گیا اور ان کی تحقیق کو سراہا گیا۔
امتحان کے بعد پرنسپل کالج پروفیسر ڈاکٹر سید محمد عمران، وائس پرنسپل پروفیسر اظہر محمود (صدر شعبہ اردو) اور دیگر سپروائزنگ اساتذہ نے ممتحنِ محترم کے ساتھ طلبہ و طالبات کی کامیابی پر خوشی کا اظہار کیا اور نیک تمناؤں کا اظہار کیا۔
