راولپنڈی (پنڈی پوسٹ نیوز) پاکستانی سیکیورٹی اداروں نے بھارتی خفیہ ایجنسی را کیلئے جاسوسی میں ملوث 3 افراد کو گرفتار کرلیا۔
ذرائع نے بتایا کہ گرفتار ملزمان کا تعلق نارووال، بہاولپور اور آزاد کشمیر کے ضلع نیلم سے ہے۔
تحقیقات میں یہ لرزہ خیز انکشاف ہوا ہے کہ بھارتی ایجنسی نے ملزمان کو سوشل میڈیا ایپس پر ‘ہنی ٹریپ’ (خواتین کے ذریعے جال میں پھنسانا) اور خطیر رقم کا لالچ دے کر حساس معلومات حاصل کیں۔ملزمان نے اعتراف کیا ہے کہ وہ سوشل میڈیا کے ذریعے ‘را’ سے منسلک خواتین کے رابطے میں تھے اور انہیں ایزی پیسہ، بینک اکاؤنٹس اور کرپٹو والٹس کے ذریعے رقوم منتقل کی جاتی تھیں۔
سیکیورٹی ذرائع کا کہنا ہے کہ ملک دشمن عناصر کے خلاف زیرو ٹالرنس پالیسی اپنائی گئی ہے اور ان ملزمان پر ‘آفیشل سیکرٹ ایکٹ’ کے تحت مقدمات چلا کر سزائیں بھی سنا دی گئی ہیں۔
دفاعی ماہرین کا کہنا ہے کہ بھارت مسلسل معصوم شہریوں کو ہنی ٹریپ اور پیسوں کا لالچ دے کر ریاست کے خلاف استعمال کر رہا ہے، جس کے شواہد پہلے بھی منظرِ عام پر آ چکے ہیں۔
عوام کو ہدایت کی گئی ہے کہ وہ سوشل میڈیا پر اجنبی افراد سے رابطے کرتے وقت دشمن کے ان حربوں سے انتہائی محتاط رہیں۔
