پوٹھوہاری ادب نی دُنیا وچ ہر پاسے نہھیرا ای نہھیرا کُھلتِیاں آکھّاں نال راج پیا کرناں سا
اسے راج نی وجہ سوں اسنے چوّاں پاسے نعرے پئے لغنڑیں سنڑ
اس نہھیرے چنگی پہھلی لوئی کی انّا کری شوڑیا سی
بہوں مدت سُوں بعد ہک لوئی نے تارے نہھیرے وچوں چہھاتی ماری اس چہھاتی مارنے نال ای نہھیرے نی اکھیاں اندر ڈیرے لائی کِدے
فر نہھیرا اگے اگے تے لوئی ناں تارا پچھے پچھے
اے تارا
لفظاں تے خیالاں نال ہر چیزے کی روشن پیا کرنا سا اے لوئی نا سوہنڑاں تارا ساہڑہ فخر تے پوٹھوہار ناں مانڑ جناب شاہد لطیف ہاشمی ار اے جنہاں 1964اچ سکھو گوجر خان اچ اکھ کھولی تعلیم اپر نظر ماراں تے ایم ایس سی نال ایل ایل بی وی کیتی نے
1999اچ وکالت نال جڑے تے حالیں تیکر اسے نال ای یاری لائی وی نے
انہاں نے ساوے تے کہھنڑے لفظاں نہ صرف ہر پاسے سبزا کیتا بلکہ نہیرے کی ننگا کری کے نسانڑیں وچ وی اپنڑی سعی کیتی۔
انہاں نی پورے معاشرے اپر ڈاہڈی تے پینڈی نظر اے اسے ماریوں انہاں نی ہر کہانڑی نا اپنڑاں نواں موضوع تے سرناواں اے
انہاں اگے کہانڑیاں ککلی بائی کے اسنیاں اے گلاں گلاں اچ کہانڑی وچوں نواں تے نویکلا خیال کڈّی کننڑے انہاں نیاں نکیاں نکیاں کہھانڑیں پورے پورے ناول بنڑی سکڑیں اپروں انہاں نے لخنڑیں نا انداز لخاری کی اگے سوں اگے پڑھنے نا شوق باہنڑاں
انہاں نیاں کہھانڑیاں،ثبوت،ہٹھ،لانگ مارچ،سواد، تباہی،پانڑ، مت،ترکھا وغیرہ پڑھی تے لغنڑاں اے ادب عالیہ اچ شامل ہونڑیاں چائی نیاں انڑ
شاہد لطیف ہاشمی ہوراں نی اس کتاب اچ ماضی نال نال نویں دور نے مسلیآں کی وی کہھانڑی اندر برتیا گیا ساہڑیاں آسنے آلیاں نسلاں کی بہوں چنگے سبق وی دتے نے
اے گل مننی پیسی جے ہر بندہ کسے نا کسے کم ماریوں پیدا ہونڑاں شاہد لطیف ہاشمی ار اسرے لغنڑاں جیصرف لخنڑے ماریوں پیدا ہوئینوں، انہاں نے باقی ادبی کم تکھو تے زیادہ تخلیقی اے، سب سوں اوکھا انہاں نے خیالاں نی زنویں بہوں شاداب اے جس اپر کدے وی خزاں نی اچھی سکنڑیں کیاں جے اے ہر ویلے دنیا نال جڑے رہنڑیں دنیا نا جڑے بندے ہمیشہ ساوے رہنڑیں شاہد لطیف ہاشمی اوراں نی ایہہ کتاب
ا باقی کتاباں ار پوٹھوہاری ادب اچ زندہ رہسی
دُعا گو
شکور احسن
