خطہ کوہسارکی بیٹی فرح ناز نے قانون کی ڈگری میں گولڈ میڈل حاصل کر کے والدین کا سر فخر سے بلند کر دیا۔

مری(اویس الحق سے)خطہ کوہسار کےلئے ایک اور بڑا اعزاز,معروف عالم دین اور سیاسی شخصیت علامہ قاری اکسیر عباسی کی صاحبزادی نے قانون کی ڈگری میں گولڈ میڈل حاصل کر کے نہ صرف اپنے خاندان بلکہ پوری خطہ کوہسار کا سر فخر سے بلند کر دیا ہے۔ یہ شاندار کامیابی ان کی انتھک محنت،جذبے اور علمی قابلیت کا منہ بولتا ثبوت ہے۔فرح ناز مری کے نوجوان طلبہ و طالبات، خصوصاً خواتین کے لیے مشعلِ راہ ہیں۔ ان کی کامیابی یہ ثابت کرتی ہے کہ اگر لگن،استقامت اور تعلیم سے محبت ہو تو کوئی بھی منزل دور نہیں۔فرح ناز عباسی کی یہ کامیابی آنے والی نسلوں کے لیے ایک روشن مثال ہے، اور ان کی محنت ہر اس شخص کے لیے حوصلہ افزا ہے جو علم کی روشنی سے اپنا مستقبل روشن کرنا چاہتا ہے۔اس موقع پر فرح ناز نے کہا کہ انسان کی کامیابی کے پیچھے ہمیشہ والدین کی دعاؤں کا اثر ہوتا ہے۔ یہ دعائیں ایک ایسا سرمایہ ہیں جو دنیا کی کسی دولت سے نہیں خریدا جا سکتا۔ اگر کامیابی کے اس مبارک موقع پر والدین کا سایہ سر پر قائم ہواور ان ہی کے ہاتھوں سے کامیابی کا سہرا سجایا جائے تو یہ خوش نصیبی اور اعزاز کسی بڑے سے بڑے عہدے سے بڑھ کر ہوتا ہے۔ یہ وہ لمحہ ہوتا ہے جب بزرگ اپنے بچے کو کامیاب دیکھ کر دل سے خوش ہوتے ہیں اور یہی خوشی انسان کی سب سے بڑی کامیابی بن جاتی ہے۔