چیف ٹریفک آفیسر اسلام آباد نے وفاقی دارا لحکو مت میں ٹریفک نظم و ضبط برقرار رکھنے اور شہریوں کی سہولت کے لیے نئی ٹریفک ایڈوائزری جاری کر دی۔
ایڈوائزری کے مطابق ہیوی ٹریفک کا داخلہ اسلام آباد میں صرف رات 12 بجے سے صبح 5 بجے تک کی اجازت ہوگی، جبکہ دن کے اوقات میں ہیوی ٹریفک کے داخلے پر مکمل پابندی عائد رہے گی۔
چیف ٹریفک آفیسر نے کہا کہ گاڑیوں پر سیاہ شیشے لگانے پر مکمل پابندی برقرار ہے، اور خلاف ورزی کرنے والوں کے خلاف سخت قانونی کارروائی عمل میں لائی جائے گی۔
مزید کہا گیا کہ موٹر سائیکل پر تین سواروں کے خلاف بھی سخت کارروائی کی جائے گی۔
سی ٹی او کے مطابق تمام بس اڈہ مالکان اور منیجران کے ساتھ فوری اجلاس منعقد کیے جائیں گے تاکہ ٹریفک قوانین پر سختی سے عمل درآمد یقینی بنایا جا سکے۔
ایڈوائزری میں واضح کیا گیا ہے کہ کوئی بھی پبلک ٹرانسپورٹ گاڑی مقررہ اڈوں کے علاوہ کسی اور مقام پر مسافروں کو بٹھانے یا اتارنے کی مجاز نہیں ہوگی، اور بس مالکان ٹکٹ جاری کیے بغیر کسی مسافر کو سوار نہیں کریں گے۔
اسی طرح سامان بردار گاڑیوں (ٹرکوں) کے مالکان و منیجران کے ساتھ بھی اجلاس کیے جائیں گے، اور تمام لوڈ شدہ گاڑیوں کو صرف مقررہ مقامات پر ہی خالی کرنے کی ہدایت دی گئی ہے
چیف ٹریفک آفیسر نے کہا کہ ٹریفک قوانین پر سختی سے عمل درآمد شہریوں کی حفاظت، ٹریفک کی روانی اور امن و امان کی بہتری کے لیے ضروری ہے۔
