اسلام آباد (حذیفہ اشرف) وزیراعظم یوتھ پروگرام کے تحت ملک کے ہونہار طلباء و طالبات میں لیپ ٹاپ تقسیم کرنے کا نیا مرحلہ آج سے شروع ہو گیا ہے۔ اس سلسلے میں مرکزی تقریب جناح کنونشن سینٹر اسلام آباد میں منعقد کی گئی، جس میں مختلف جامعات کے طلباء نے شرکت کی۔تفصیلات کے مطابق، حکومت نے نجی اور سرکاری جامعات کے اشتراک سے میرٹ پر مبنی طلباء کی فہرستیں تیار کی تھیں۔ ان فہرستوں کے مطابق ایک لاکھ سے زائد طلباء کو جدید لیپ ٹاپ فراہم کیے جائیں گے تاکہ وہ اپنی تعلیم اور تحقیق کے میدان میں مزید آگے بڑھ سکیں۔وزیراعظم یوتھ پروگرام کے چیئرمین رانا مشہود احمد خان کا کہنا تھا کہ نوجوان پاکستان کا قیمتی سرمایہ ہیں، انہیں ٹیکنالوجی اور تعلیم کے میدان میں بااختیار بنانا حکومت کی اولین ترجیح ہے۔قابل ذکر بات یہ ہے کہ سابق وزیراعظم نواز شریف کے دور میں بھی طلباء کے لیے لیپ ٹاپ اسکیم شروع کی گئی تھی، جس کے تحت ہزاروں طلباء جدید ٹیکنالوجی سے مستفید ہو چکے ہیں۔—
