راولپنڈی (نمائندہ خصوصی) پیرودہائی کے علاقے میں اپنے بھتیجے کو قتل کرنے والے مرکزی ملزم اور اس کے ساتھی نے پولیس پارٹی پر اندھا دھند فائرنگ کردی، جس کے نتیجے میں انسپکٹر مرزا عارف اور کانسٹیبل نعمت اللہ شدید زخمی ہوگئے، جبکہ پولیس کے ہمراہ موجود دو شہری جان کی بازی ہار گئے۔
ذرائع کے مطابق پولیس پارٹی ملزمان کی گرفتاری کے لیے مدعیوں کے ہمراہ جائے وقوعہ کی نشاندہی اور ملاحظے کے لیے پہنچی تھی۔ جیسے ہی پولیس ٹیم موقع پر پہنچی، چھت پر چھپے ہوئے ملزمان نے پولیس پر اچانک فائرنگ شروع کر دی۔
فائرنگ کے نتیجے میں انسپکٹر مرزا عارف اور کانسٹیبل نعمت اللہ شدید زخمی ہو گئے جنہیں فوری طور پر طبی امداد کے لیے قریبی اسپتال منتقل کر دیا گیا ہے۔ زخمیوں کی حالت تشویشناک بتائی جا رہی ہے۔
پولیس کی بھاری نفری موقع پر پہنچ چکی ہے اور علاقے کو گھیرے میں لے کر سرچ آپریشن شروع کر دیا گیا ہے۔ واقعے کے بعد علاقے میں خوف و ہراس پھیل گیا۔
پولیس حکام کے مطابق ملزمان کی گرفتاری کے لیے تمام وسائل بروئے کار لائے جا رہے ہیں، اور اس واقعے میں ملوث افراد کو جلد از جلد قانون کے کٹہرے میں لایا جائے گا۔
