راولپنڈی انسداد دہشت گردی راولپنڈی کی خصوصی عدالت کے روبرو تحریک انصاف کے 26 نومبر کے احتجاج پر تھانہ صادق آباد کے مقدمہ میں نامزد سابق چیئرمین کی ہمشیرہ علیمہ خانم کے وکیل نے مزید 6 گواہان پر جرح مکمل کر لی گئی جس پر عدالت نے مزید گواہان کو طلب کرتے ہوئے سماعت آج (بروز جمعرات) تک ملتوی کردی
گزشتہ روز سماعت کے موقع پر علیمہ خانم اپنے وکیل فیصل ملک کے ہمراہ عدالت پیش ہوئی جبکہ سپیشل پراسیکیوٹر ظہیر شاہ بھی ٹیم کے ہمراہ موجود تھے اس موقع علیمہ خانم کے وکیل نے استغاثہ کے اے ایس آئی ظہیر، کانسٹیبل بابر اور اے ایس آئی کاظم رضا، اسسٹنٹ آئی ٹی پولیس طارق، سب انسپکٹر اقبال اور ڈی ایف سی مرسلین پر مشتمل 6 گواہان پر جرح مکمل کر لی
اس طرح اس مقدمے میں مجموعی طور پر 7 گواہان پر جرح مکمل کرلی گئی کسی وقفے کے بغیر 3 گھنٹے تک جاری رہنے والی سماعت کے دوران علیمہ خانم کا وڈیو بیان بھی سکرین پر چلایا گیا جبکہ جرح کے دوران وکیل صفائی اور پراسیکیوشن کے درمیان تلخ جملوں کا تبادلہ بھی ہوتا رہا پراسیکیوشن کا موقف تھا کہ وکیل صفائی گواہان سے غیر ضروری سوال پوچھ کر عدالت کا وقت ضائع کررہے ہیں جبکہ ملزمہ کے وکیل کا موقف تھا کہ جرح کرنا
وکیل صفائی کا حق ہے پراسیکیوشن مداخلت نہیں کرسکتی پراسیکیوشن کی مداخلت پر ملزمہ کے وکیل نے جرح چھوڑ کر جانے کی دھمکی دی جس پر عدالت نے ریمارکس دیئے کہ آپ جرح نہیں کرنا چاہتے تو ہم آرڈر میں یہی لکھ دیتے ہیں عدالت نے ہدایت کی کہ وکیل صفائی گواہان سے غیر متعلقہ سوال نہ پوچھیں تاہم گواہان پر جرح مکمل ہونے پر عدالت نے مزید گواہان کو طلب کرتے ہوئے سماعت آج (بروز جمعرات) تک ملتوی کردی
