کراچی (اسٹاف رپورٹر) امیر جماعت اسلامی حافظ نعیم الرحمن نے فاران کلب میں حلقہ خواتین کراچی کے تحت سوشل میڈیا میٹ اپ بعنوان Karachi Connectسے خصوصی خطاب کرتے ہوئے کہا ہے کہ جماعت اسلامی عوام کو ساتھ ملا کر انقلاب اور اسلامی نظام کے قیام کی جدوجہد کررہی ہے
اسلام اخلاقیات، معیشت، معاشرت، تجارت، قانون، تعلیم، ذاتی و معاشرتی زندگی اور حکومت و ریاست سمیت ہر معاملے میں رہنمائی فراہم کرتا ہے، اسلام کے پیغام کو نشر کرنے کے لیے جو جو جدید آلات ہوسکتے ہیں انہیں استعمال کرنا ہے، امریکہ و اسرائیل ٹیکنالوجی میں بہت آگے ہیں، ہم امریکہ و اسرائیل کی ٹیکنالوجی سے ہی ان کو شکست دیں گے، سوشل میڈیا میں ظلم کے نظام کو نہ صرف اجاگر کرنا بلکہ ظلم کے خلاف بغاوت اور اسلام کے عادلانہ نظام کے قیام کی تحریک چلانا ہوگی، ملک میں اجارہ داری نظام کے ذریعے عوام کو دباکر رکھا گیا ہے ،سوشل میڈیا کے ذریعے عوام کو آگاہ اوراجارہ داری نظام کے خلاف متحد کرنا ہے ،
ہمارا مقصد اتحادویکجہتی پیدا کرنا ،انتشار کا خاتمہ، نوجوانوں کو امپاور کرنا ہے اور جو لوگ معاشرے میں نوجوانوں کو نشے کا عادی بنارہے ہیں ان کے خلاف تحریک چلاناہے ،شہر میں فیکٹریوں میں کام کرنے والی خواتین کے لیے کوئی آواز نہیں اٹھاتا،لاکھوں عورتیں دیہاڑی دار ملازم کے طور کام کرتی ہیں انہیں ملازمت کے حقوق حاصل نہیں،فیکٹریوں میں کام کرنے والی خواتین کی آواز بننے کی ضرورت ہے ،حکومت و ریاست کے تحت تعلیم کا نظام یکساں ہونا چاہیے تھا لیکن یہاں بھی تقسیم پیدا کی گئی ہے ،تعلیم کو بھی خریدا جاتا ہے ،پاکستان میں رہنے والے ہر بچے اور بچی کا حق ہے کہ اسے معیاری اور مفت تعلیم دی جائے ۔ انہوں نے مزید کہا کہ دہائیاں گزر گئی ہیں عوام اپنے حق سے محروم ہیں۔
