اسلام آباد: اسلام آباد فوڈ اتھارٹی نے دودھ میں ملاوٹ کے خلاف ایک بڑی کارروائی کرتے ہوئے 10 ہزار 890 لٹر دودھ کی چیکنگ کی، جس میں سے 2 ہزار 340 لٹر ملاوٹی دودھ تلف کر دیا گیا۔ اس کارروائی میں 20 دودھ بردار گاڑیوں کی چیکنگ کی گئی، جن میں سے 17 گاڑیاں معیاری پائی گئیں، جبکہ 3 گاڑیاں ملاوٹ شدہ دودھ کے ساتھ پکڑی گئیں۔
اس کریک ڈاؤن کا مقصد عوام کو صحت مند اور معیار کے مطابق دودھ کی فراہمی کو یقینی بنانا ہے۔ ڈاکٹر طاہرہ صدیق، ڈپٹی ڈائریکٹر اسلام آباد فوڈ اتھارٹی نے کہا کہ “دودھ کے معیار پر زیرو ٹالرنس پالیسی ہے اور ہم اس بات کو یقینی بنائیں گے کہ دودھ میں کسی قسم کی ملاوٹ نہ ہو، تاکہ شہریوں کو غذائیت سے بھرپور دودھ فراہم کیا جا سکے۔”
انہوں نے مزید کہا کہ “ملاوٹی دودھ کا استعمال بچوں اور بزرگوں کے لیے مختلف بیماریوں کا سبب بن سکتا ہے۔ اس لیے اس قسم کی کارروائیاں مسلسل جاری رکھی جائیں گی۔” اس دوران 1 لاکھ 18 ہزار روپے کے جرمانے بھی عائد کیے گئے ہیں۔
یہ کارروائی اسلام آباد کے این 5 میٹرو اسٹیشن 26 نمبر پر علی الصبح کی گئی، جہاں ناکہ بندی کر کے دودھ کی چیکنگ کی گئی۔ ڈاکٹر طاہرہ صدیق نے کہا کہ “ناکہ بندی کے ذریعے غیر معیاری دودھ کی سپلائی کو ناکام بنایا گیا ہے اور ہم اس بات کو یقینی بنائیں گے کہ دودھ کے معیار میں کوئی کمی نہ ہو۔”
