کلرسیداں (نمائندہ خصوصی)
تھانہ کلرسیداں کی حدود میں واقع موہڑہ بختاں میں افسوسناک سانحہ پیش آیا ہے جہاں دو کم عمر سگے بھائی بارش کے کھڑے پانی میں نہاتے ہوئے ڈوب کر جاں بحق ہو گئے۔ جاں بحق ہونے والے بچوں کی شناخت 11 سالہ حیدر علی اور 10 سالہ دانیال کے نام سے ہوئی ہے، جو طاہر محمود کے بیٹے تھے۔
واقعے کے مطابق دونوں بھائی سوموار کی شام گھر کے قریب ایک پرائیویٹ ہاؤسنگ سوسائٹی کے بنائے گئے نکاسی آب کے نالے میں جمع ہونے والے بارش کے پانی میں نہا رہے تھے۔ نہانے کے دوران گہرے پانی میں پھسل کر دونوں بچے ڈوب گئے۔ اطلاع ملنے پر ریسکیو 1122 کی ٹیم اور مقامی افراد موقع پر پہنچے اور فوری کارروائی کے بعد دونوں بچوں کی لاشیں نکال لی گئیں۔
سانحے کے بعد پورے علاقے میں کہرام برپا ہو گیا اور اہل علاقہ کی بڑی تعداد جائے وقوعہ پر پہنچ گئی۔ دونوں بچے نہایت ذہین اور والدین کے لاڈلے تھے، جن کی اچانک موت نے ہر آنکھ کو اشکبار کر دیا۔
مرحوم بچوں کی نماز جنازہ آج رات 10 بجے ادا کی جائے گی۔
اہل علاقہ اور متاثرہ خاندان نے حکومت اور ضلعی انتظامیہ سے مطالبہ کیا ہے کہ پرائیویٹ ہاؤسنگ سوسائٹیوں کے نکاسی آب کے نظام پر مؤثر نگرانی کی جائے اور حفاظتی اقدامات کو یقینی بنایا جائے تاکہ مستقبل میں اس نوعیت کے المناک واقعات سے بچا جا سکے۔
