فخرِ چونترہ – اے ایس پی انم شیر خان نے عالمی سطح پر پاکستان کا نام روشن کر دیا

نمائندہ پنڈی پوسٹ: حافظ عزیر شفیق بھٹی

پاکستانی خواتین کی صلاحیتوں کا اعتراف ایک بار پھر عالمی سطح پر ہوا، جب راولپنڈی کے علاقے تھانہ چونترہ سنگرال سے تعلق رکھنے والی اسسٹنٹ سپرنٹنڈنٹ آف پولیس (ASP) انم شیر خان نے دبئی میں ہونے والے ورلڈ پولیس سمٹ 2025 میں “Excellence in Criminal Investigation” کے زمرے میں پہلی پوزیشن حاصل کی۔

ورلڈ پولیس سمٹ میں دنیا کے 192 ممالک سے تعلق رکھنے والے پولیس افسران کی کارکردگی کا جائزہ لیا گیا۔ اے ایس پی انم شیر خان کی پیشہ ورانہ مہارت، تفتیشی قابلیت اور مجرمانہ معاملات کو مؤثر انداز میں نمٹانے کی صلاحیت کو سراہتے ہوئے انہیں بین الاقوامی سطح کا یہ قابلِ فخر اعزاز عطا کیا گیا۔

فی الحال انم شیر خان پنجاب پولیس میں بطور SDPO سٹی سرکل سرگودھا خدمات انجام دے رہی ہیں، جہاں وہ نہ صرف قانون کی عملداری بلکہ خواتین کی حوصلہ افزائی اور انصاف کی فراہمی میں بھی نمایاں کردار ادا کر رہی ہیں۔

ان کی یہ کامیابی نہ صرف ان کی ذاتی محنت کا نتیجہ ہے بلکہ پنجاب پولیس اور وطنِ عزیز پاکستان کے لیے بھی باعثِ فخر ہے۔ یہ اعزاز خواتین کو پولیس فورس کا حصہ بننے اور ملک و قوم کی خدمت کرنے کی نئی تحریک فراہم کرے گا۔

اے ایس پی انم شیر خان نے اپنے بیان میں کہا:
“میری یہ کامیابی میرے والدین کی دعاؤں، میری ٹیم کی محنت اور وطن سے محبت کی عکاس ہے۔ پاکستان کی نمائندگی میرے لیے اعزاز ہے۔”

چونترہ کی یہ بیٹی آج پوری قوم کے دل جیت چکی ہے — فخرِ چونترہ، فخرِ پاکستان!