اسلام آباد: جسٹس امین الدین خان نے جمعہ کے روز پاکستان کی نئی قائم کردہ وفاقی آئینی عدالت کے پہلے چیف جسٹس کے طور پر حلف اٹھا لیا۔ حلف برداری کی تقریب ایوانِ صدر میں منعقد ہوئی، جہاں صدرِ مملکت آصف علی زرداری نے ان سے حلف لیا۔ تقریب میں اعلیٰ سرکاری حکام، عدلیہ اور قانونی برادری کے نمائندوں نے شرکت کی۔
وفاقی آئینی عدالت کا قیام 27ویں آئینی ترمیم کے تحت عمل میں آیا ہے، جس کا بنیادی مقصد آئینی نوعیت کے مقدمات کو سپریم کورٹ سے الگ کر کے ایک مخصوص فورم کے سپرد کرنا ہے۔ اس ترمیم کے تحت عدالت کے ججوں کی ریٹائرمنٹ کی عمر بھی 68 سال مقرر کی گئی ہے۔
