وفاقی وزیر داخلہ محسن نقوی سرکاری دورے پر برادر ہمسایہ ملک ایران پہنچ گئے۔

اسلام آباد(اویس الحق سے)وفاقی وزیر داخلہ محسن نقوی سرکاری دورے پر برادر ہمسایہ ملک ایران کے شہر تہران پہنچ گئے۔امام خمینی انٹرنیشنل ایئرپورٹ پر اترے جہاں ایران کے وزیر داخلہ اسکندر مومنی نے ان کا پرتپاک استقبال کیا۔

اس موقع پر ایران کی وزارت داخلہ کے سینئر حکام، پاکستان کے سفیر محمد مدثر ٹیپو،آفتاب بٹ اور سفارتی افسران بھی موجود تھے بعد ازاں محسن نقوی نے اپنے ایرانی ہم منصب سے ملاقات کی جس میں باہمی دلچسپی کے امور اور پاک ایران تعلقات پر تبادلہ خیال کیا گیا۔

وزیر داخلہ ایران نے کہا کہ ہم اپنے برادر ملک پاکستان کو تہہ دل سے خوش آمدید کہتے ہیں،آپ کا دورہ پاکستان ایران تعلقات کو مزید مضبوط بنانے میں معاون ثابت ہوگا۔اس موقع پر محسن نقوی نے ریمارکس دیئے کہ ایران ایک برادر ہمسایہ ملک ہے اور پاکستان دوطرفہ تعلقات کو خصوصی اہمیت دیتا ہے۔

انہوں نے امید ظاہر کی کہ پاکستان، ایران اور عراق پر مشتمل سہ ملکی کانفرنس سے زائرین کو درپیش مسائل کے حل میں مدد ملے گی۔محسن نقوی نے ایران کے سپریم لیڈر آیت اللہ علی خامنہ اور صدر مسعود پیزشکیان کے لیے نیک تمناؤں کا بھی اظہار کیا۔محسن نقوی حجاج اور سرحدی مسائل سے خطاب کرنے والی سہ ملکی کانفرنس میں بھی شرکت کریں گے۔

کانفرنس میں ایران اور عراق کے وزرائے داخلہ بھی شریک ہوں گے۔سہ ملکی کانفرنس پاکستان کی درخواست پر منعقد کی جا رہی ہے تاکہ زائرین کوسرحدوں اور دیگر خدشات سے متعلق مسائل کو حل کیا جا سکے۔ محسن نقوی اپنے دورے کے دوران ایران کے صدر مسعود پیزشکیان سے بھی ملاقات کریں گے۔