بیس سال بعد لاہور میں بسنت کی واپسی پر شہر بھر میں جشن کا سماں قائم ہو چکا ہے۔ ایک طرف صوبے بھر میں عام تعطیل کا اعلان کیا گیا ہے، تو دوسری جانب لاہور کے مختلف مقامات کو رنگ برنگی جھنڈیوں، بینرز اور روشنیوں سے سجا دیا گیا ہے۔ بازاروں میں پتنگ، ڈور اور بسنت سے جڑی دیگر اشیا کی خریداری کے لیے شہریوں کی لمبی قطاریں نظر آ رہی ہیں۔
چھتوں پر تیاریاں عروج پر ہیں، بچوں کے چہروں پر خوشی جھلک رہی ہے جبکہ بزرگ اپنی یادوں میں کھوئے دکھائی دیتے ہیں۔ انتظامیہ کی جانب سے سیکیورٹی اور حفاظتی اقدامات کو یقینی بنانے کے دعوے کیے جا رہے ہیں تاکہ یہ تہوار خوشی اور امن کے ساتھ منایا جا سکے۔ لاہور ایک بار پھر رنگوں، مسکراہٹوں اور زندگی سے بھرپور دکھائی دے رہا ہے۔
