گوجر خان(نمائندہ پنڈی پوسٹ)سابق وزیراعظم پاکستان راجہ پرویز اشرف نے یوم تشکر کے موقع پر کیپٹن راجہ محمد سرور شہید (نشانِ حیدر) کے مزار پر حاضری دی، پھول چڑھائے اور فاتحہ خوانی کی۔یہ تقریب افواجِ پاکستان کی شاندار کامیابی کے اعتراف میں منعقد کی گئی تھی، جس میں راجہ پرویز اشرف نے خصوصی شرکت کی۔
اس موقع پر میڈیا سے گفتگو کرتے ہوئے راجہ پرویز اشرف نے کہا کہ وہ افواجِ پاکستان کی جرات اور قربانیوں کو سلام پیش کرتے ہیں۔ انہوں نے کہا کہ ملک کے دفاع اور امن کے قیام میں ہمارے بہادر سپاہیوں کا کردار ناقابل فراموش ہے۔انہوں نے مزید کہا کہ کیپٹن سرور شہید سمیت تمام شہداء نے جو قربانیاں دیں، ان پر پوری قوم کو فخر ہے اور ہمیں ہمیشہ ان کے مشن کو زندہ رکھنا ہوگا۔
یاد رہے کہ آج ملک بھر میں ازلی دشمن بھارت کے دانت کھٹے کرنے پر افواج پاکستان کو خراج تحسین پیش کرنے کیلئے اور اللہ کے حضور شکر ادا کرنے کے لئے یوم تشکر منایا جارہا ہے دن کا آغاز وفاقی دارالحکومت میں 31 اور صوبائی دارالحکومتوں میں 21،21 توپوں کی سلامی سے کیا گیا۔
