گوجرخان: 22 سالہ نوجوان اوگاہون ڈیم میں ڈوب کر جاں بحق، لاش کی تلاش جاری

گوجرخان (نمائندہ خصوصی) — گوجرخان کی نواحی بستی دیرہ مسلم کا رہائشی 22 سالہ نوجوان اورنگزیب اوگاہون ڈیم میں نہاتے ہوئے پانی کی گہرائی میں ڈوب کر جاں بحق ہوگیا۔ واقعہ آج دوپہر کے وقت پیش آیا جب اورنگزیب اپنے دوستوں کے ہمراہ پکنک منانے کے لیے اوگاہون ڈیم پہنچا تھا۔

زرائع کے مطابق نوجوان پانی میں نہاتے ہوئے اچانک گہرائی میں چلا گیا اور پھر واپس سطح پر نہ آ سکا۔ دوستوں کی جانب سے فوری طور پر ریسکیو 1122 کو اطلاع دی گئی، جس کے بعد امدادی ٹیمیں موقع پر پہنچ گئیں اور لاش کی تلاش شروع کر دی گئی۔

ریسکیو اہلکاروں نے شام دیر تک سرچ آپریشن جاری رکھا، تاہم اندھیرے اور پانی کی گہرائی کے باعث تاحال نوجوان کی لاش نہیں مل سکی۔ حکام کے مطابق ریسکیو آپریشن کل صبح دوبارہ شروع کیا جائے گا۔

نوجوان کی موت کی خبر سنتے ہی علاقے میں کہرام مچ گیا اور لواحقین غم سے نڈھال ہو گئے۔ اہل علاقہ نے انتظامیہ سے مطالبہ کیا ہے کہ ڈیم کے مقام پر حفاظتی انتظامات کیے جائیں تاکہ مستقبل میں ایسے المناک واقعات سے بچا جا سکے۔

مزید تفصیلات اور اپڈیٹس کا انتظار ہے۔