راولپنڈی کے مصروف ترین کچہری چوک پر جاری ترقیاتی منصوبے کی تکمیل کے لیے انتظامیہ نے نئی ڈیڈ لائن مقرر کر دی ہے۔ حکام کے مطابق اس منصوبے کو اب 31 مئی تک مکمل کرنے کا ہدف رکھا گیا ہے، جس کے لیے تعمیراتی کام کی رفتار مزید تیز کر دی گئی ہے۔
انتظامیہ کا کہنا ہے کہ کچہری چوک ری ماڈلنگ منصوبہ مجموعی طور پر تقریباً 14 ارب روپے کی لاگت سے مکمل کیا جا رہا ہے۔ اس منصوبے میں فلائی اوور، انڈر پاس اور سڑکوں کی بہتری شامل ہے تاکہ شہر میں ٹریفک کے دباؤ کو کم کیا جا سکے۔
یہ منصوبہ امّار چوک سے موٹروے چوک تک سگنل فری کوریڈور کا ایک اہم حصہ ہے، جس کی تکمیل کے بعد راولپنڈی اور اسلام آباد کے درمیان ٹریفک کی روانی میں نمایاں بہتری آنے کی توقع ہے۔
حکام کے مطابق منصوبے کے تحت جناح پارک (سابق بھٹو پارک) میں 1.6 ارب روپے کی لاگت سے ایک جدید پارکنگ پلازہ بھی تعمیر کیا جا رہا ہے، جس کا مقصد عدالتوں اور ملحقہ علاقوں میں پارکنگ کے دیرینہ مسئلے کا حل نکالنا ہے۔
انتظامیہ نے منصوبے کو مقررہ وقت میں مکمل کرنے کے لیے تعمیراتی عملے کو ڈبل شفٹ میں کام کرنے کی ہدایات جاری کر دی ہیں، تاکہ معیار پر سمجھوتہ کیے بغیر منصوبہ جلد از جلد مکمل کیا جا سکے۔
حکام کا کہنا ہے کہ منصوبے کی تکمیل کے بعد کچہری چوک اور اس سے ملحقہ علاقوں میں ٹریفک جام میں واضح کمی آئے گی اور شہریوں کو روزمرہ آمدورفت میں سہولت حاصل ہوگی۔
