کلر سیداں بھاری مقدار میں منشیات اور ناجائز اسلحہ برآمد

کلرسیداں(نمائندہ پنڈی پوسٹ)
کلر سیداں پولیس کی کارروائیاں بھاری مقدار میں منشیات اور ناجائز اسلحہ برآمد۔ تھانہ کلر سیداں پولیس نے منشیات فروشوں اور مجرمانہ عناصر کے خلاف مؤثر کارروائیاں کرتے ہوئے بڑی کامیابیاں حاصل کی ہیں۔

ایک کارروائی میں پولیس نے منشیات فروش عامر شہزاد کو گرفتار کرتے ہوئے اس کے قبضے سے تین کلو پانچ سو گرام چرس برآمد کر لی۔ پولیس نے ملزم کے خلاف مقدمہ درج کر کے مزید تفتیش شروع کر دی ہے۔دوسری کارروائی میں پولیس نے دورانِ جسمانی ریمانڈ ملزم تصدق حسین کی نشاندہی پر ایک 30 بور پسٹل بمعہ دو زندہ روند برآمد کر لیے۔

تفتیش کے دوران یہ بات سامنے آئی کہ ملزم نے مدعی مقدمہ فیضان غالب کو جھگڑے کے دوران پسٹل کے بٹ سے زخمی کیا تھا اور بعد ازاں پسٹل کو اپنے گھر میں چھپا دیا تھا۔پولیس نے دونوں مقدمات میں قانونی کارروائی مکمل کرتے ہوئے مزید تحقیقات کا دائرہ وسیع کر دیا ہے۔ پولیس کا کہنا ہے کہ مجرمانہ سرگرمیوں میں ملوث افراد کے خلاف زیرو ٹالرنس پالیسی پر عمل کیا جا رہا ہے۔